Opnar tøff hinderløype på Halsnøy

Laurdag 15. august kjem soldatar, politifolk og lokale idrettsutøvarar til Sjøvangen på Halsnøy for å opna ei ny, beintøff hinderløype.

 

Bygginga av hinderløypa har føregått i rykk og napp dei siste to åra. Det var Røen & Sjøvangen Vel som tok initiativet og organiserte arbeidet, medan Kvinnherad Vekstbedrift har designa og bygd alle hindera. Halsnøy Trelast har stått for grunnarbeidet og grusinga, medan Fjelberg Kraftlag monterte stolpane.

– Det er eit rimeleg stort prosjekt, med ei ramme på tett oppunder 1 million kroner. Finansieringa er gjort med spelemidlar, kommunalt byggjetilskot og gode gåver frå spesielt Sparebank 1-stiftinga Kvinnherad og Sparebanken Vest-stiftinga, fortel Per Ove Kviteberg, leiar i Velforeininga.

 

Godt skjerma

For fire år sidan vart den 1,3 kilometer lange Halsnøy Sportsløype opna same stad.

– I den opphavlege sportsløypa var det prosjektert ein del treningsapparat og småhinder langs heile traseen, men så fekk vi fleire innspel på at det turgåarane ikkje ynska å bli forstyrra av pesande og sveittande løparar som trena i hindera. Då fann vi ut at det frå naturen si side var laga flott til for at hinderløypa kunne liggja innafor sportsløypa. Heldigvis er det mykje småskog i området, så hinderløypa ligg veldig godt skjerma frå resten av anlegget, opplyser Kviteberg.

Hinderløypa strekkjer seg 250 meter kvar veg, altså totalt 500 meter. Løypa vert open heile tida for alle som vil prøva seg.

– Løypa passar for spenstig ungdom i alle aldrar. Ho er bygd slik at ikkje alle vil klara å koma gjennom, og dei færraste vil greia det på fyrste forsøk. Nokre utfordringar må ein trena på, men med målbevisst arbeid vil ein klara det, vurderer Per Ove Kviteberg.

 

Ulik vanskegrad

I alt er det 13 hinder av ulik vanskegrad. Blant desse finn ein klatreveggar og balansehinder, samt ein krypetunnel som både er lang og fullstendig mørk i midten.

– Då nyttar det ikkje å få panikk, smiler Kviteberg.

På opningsdagen stiller Heimevernssoldatar frå Innsatsstyrke Bjørn West og leiarar frå HV Vestlandet til oppvising i løypa, saman med lokalt politi og idrettsfolk. I tillegg kjem kystvaktskipet «Tor» innom Vågen. At Forsvaret blir med på denne måten, skuldast nok

Tor Vidar Sæle, dagleg leiar i Kvinnherad Vekstbedrift, sine gode kontaktar i Heimevernet og Forsvaret.

Arne Torget blir konferansier på opninga. På programmet står også loppemarknad, auksjon og friluftskafé. Arrangementet er eit samarbeid mellom Røen & Sjøvangen Vel og Kvinnherad Vekstbedrift.

– Vi vonar på ei gild opning, seier Per Ove Kviteberg, som lovar at arrangementet vert heilt korona-trygt.

Interesserte kan gå inn på Vimeo og sjå ein video av løypa.