Har passert Aggvin si sigersrekke – håper fleire blir med i løpsklassen

Det kjem fram i ei pressemelding frå turgruppa i Rosendal Turnlag i samband med Kvinnheradløpet neste søndag. 6. oktober er det nemleg klart for den 42. utgåva av løpet. Sjølv om dei aller, aller fleste vel å vera med i turklassen, og spasera nokolunde roleg gjennom løypa som går forbi både garden Vidsyn, Kvinnherad kyrkje, Avlsgarden og gjennom Omshagen, er det løpsklassen som gjeld for Sindre Solbakken Omvik.

På spørsmål om kor mange gonger han har vore med i Kvinnheradløpet, blir han usikker.

– Det var eit godt spørsmål. Fyrste gongen var i alle fall då eg var 10 år. No er eg 31, så då er det er 21 år sidan fyrste gong. Eg har ikkje delteke kvart år, for eg har jo vore i militæret, og så har eg sikkert vore sjuk nokre gonger. I tillegg har eg av og til vore på fotballkampar i staden for Kvinnheradløpet, fortel omvikdelingen i pressemeldinga.

Omvik meiner han berre har sprunge når han har vore med.

Har passert Terje Aggvin

Omvik har klart kunststykket å setja ny løyperekord nesten kvart år. I 2016 vann han på 18.11, medan han i 2022 greidde å pressa tida ned til 17.20.

– Det er ein god trend. Eg har også passert Terje Aggvin i tal sigrar på rad, og det var eit av måla mine å slå han på win-streak, seier Omvik i pressemeldinga.

Statistikken viser at nemnde Aggvin frå Varaldsøy totalt har vunne 11 gonger, fem av dei på rad. Ni av sigrane kom i den gamle løypa på vel 9 kilometer, som gjekk opp gjennom Svartedalen, med Skeie og inn til stadion frå Seimsfoss.

Aggvin vann sist i 2015, medan Omvik vann for fyrste gong året etter. Sidan har omvikdelingen triumfert kvart år, men står likevel berre med seks strake. Årsaka er at det ikkje vart arrangert Kvinnheradløpet i 2020 grunna pandemien, og i 2021 var det ikkje løpsklasse grunna anleggsarbeid på stadion.

I år blir det uansett ny løyperekord, for etter innspel frå nettopp Omvik er traseen blitt forlenga med 274 meter til nøyaktig 6 kilometer.

– Veldig kjekt. Dermed blir det litt meir samanliknbart med andre løp, til dømes ved at det jo blir to gonger 3.000 meter då. Dessutan er det litt OCD (tvangstankar), for det er kjekkare med beine tal, siterer pressemeldinga Sindre Solbakken Omvik på.

Meir på stadion

Arrangøren Rosendal Turnlag Turgruppa hadde eigentleg bestemt at forlenginga skulle skje inne på stadion rett etter start, men Sindre og fleire løparar ynska heller ein ekstra runde på stadion i innspurten. Dei får no viljen sin.

– Det er kjekkare for både publikum og løparane. Då blir meir av løpet inne på stadion når du treng heiing. Og så er det kanskje meir spennande på slutten med kamp om plasseringar og spurtar, vurderer Omvik i pressemeldinga.

Løysinga som arrangøren då fall ned på er at løpsklassen startar om lag midt i nedre sving på stadion, og løparane spring ein halv runde og så ut porten nedanfor samfunnshuset.

– Mot mål kjem dei inn porten og spring halvannan runde på stadion. Målstreken er ved speakerbua og tribunen. Arrangøren understrekar at mosjonistane ikkje skal ta ekstrarunden ved målgang, men berre gå frå porten og til mål, skriv turgruppa i pressemeldinga.

Turgåarane kan i staden gå ein runde på stadion rett etter start, eventuelt spasera rett frå gymsalen og ut i bygda. Det skal dei få avgjera sjølve, begge deler blir godteke, skriv turgruppa

Joggebølgje på gang

Sindre Solbakken Omvik uttalte etter Skårhaug Opp i Uskedalen i sommar, at han føler det er ei joggebølgje på gang blant innbyggjarane i Kvinnherad. Det håpar han gjev seg utslag i påmeldinga til løpsklassen i Kvinnheradløpet.

– Ja, eg håpar det. Det er ganske mange som spring i Kvinnherad no, så me burde kunna stilla ein god gjeng. Eg skal i alle fall gjera mitt for at alle mosjonistar her i Kvinnherad stiller opp. Men det er jo sjølvsagt ikkje alle som likar å konkurrera då. Det viktigaste er å halda seg i form, seier løparen i pressemeldinga.

31- åringen spring no for den ærverdige bergensklubben Gular. I følgje pressemeldinga har han vore gjennom den nye løypa, og han kontrollmålte samstundes lengda, med framifrå resultat.

– Akkurat då eg passerte målstreken peip det 6 kilometer i GPS-en min, sluttar han i følgje meldinga.