Nytta snøen til trening

– Ta farten med deg ut av svingane! Sånn ja! Supert!

Dei oppmuntrande ropa til Per Korsvold blandar seg med frydefulle kvin og lyden av ski som skrensar i preparert snø. Oppgåva er enklare å forklara enn å gjennomføra: Skli ned ein liten bakke, ta svingen i enden av bakken med god fart og så sikksakka seg gjennom eit knippe slalåmportar med få mykje av farten som mogeleg i behald. Til slutt: hoppa over ei stong i enden. Telemarknedslag og Kongsbergknekk var valfritt, og utgjekk.

Det heile skjer med stor entusiasme og vekslande hell for gjengen Korsvold piskar på, men dei har det definitivt kjekt.

– Det er fjerde tysdagen på rad me er oppe i snøen her og har trening, men me har halde på med rulleskitrening heime i Uskedalen før det, forklarer Korsvold til Grenda.

Skileik god trening

Han trenar den aldersmessig mellomste gruppa som UIL har trening med denne dagen, saman med Erlend Bjørnebøle. No håper dei at snøen held seg forbi den varsla mildvêrsperioden som startar i desse dagar.

Tysdagsøkta gjekk til slalåmøvinga, litt «Haien kjem» og ein runde femkilomtersløypa. At det er mykje leik, er bevisst.

– Forsking viser at skileik er like god trening som intervall for barn opp til 12-13-årsalderen, og derfor kallar me dette for skileik. I dag såg eg for eksempel ei jente som har tatt store steg på teknikk, og som i dag går raskare og lettare, fordi ho har knekt kode. For dei eldste vil me trekka det meir mot skitrening, trena teknikk, dobbeldans og enkeldans, utdjupar Korsvold.

Haien kjem

På ein annan stad i skianlegget sklir Gøril Samland Eik grasiøst rundt på skøyeski og losar dei yngste langrennsløparane gjennom «Haien kjem» og slalåmportar. Ute i løypa har Tor Vidar Sæle sendt dei eldste ut på tur.

– Det er kjekt å jobba med barna, sjølv om det er litt knall og fall, litt snøballkrig og mykje leik. Dei eldste er tenåringar, der Gøril og Tor Vidar som køyrer opplegget for dei. Me håper at dei store kan dela litt av sitt med dei yngste, og visa litt kva som er mogeleg å få til, og kor flinke og raske dei er, seier trenaren.

Tysdag var det berre Uskedalen IL som hadde trening i Fjellhaugen, mellom anna grunna juleavslutningar andre stader.

– Det kan vera at OIL hengjer seg på treningane våre, noko som vil vera veldig kjekt. Me håper at langrennsmiljøet i Kvinnherad kan halda fram å bløma. Rulleskiløype på Sandvoll kan slå positivt ut for alle i skimiljøet. Me er litt stolte når me ser så mange barn ha den skigleda oppe i snøen, og me er heldige som har dette anlegget så nært for så mange, sluttar Korsvold.