Ny kunstgrasbane klar i oktober

Om ein månad blir grusbanen i Uskedalen omgjort til kunstgras, og det er berre fyrste ledd i planane om ein ny og storslått aktivitetspark i bygda.

Etter å ha fått mandat frå Uskedalen IL for om lag halvanna år sidan, starta mannfolka bak «Gull av grus» planlegginga av den nye aktivitetsparken i Uskedalen. Fyrst ut er kunstgrasdekke over den gamle grusbanen. Og her har arbeidet gått unna. For knappe tre veker sidan starta Brødrene Musland grunnarbeidet på banen, og allereie i løpet av neste veke kan dei vera klare til å leggja på dekket.

– Det skjer mykje den komande veka. I løpet av helga blir banen slådda, så skal det drenerast og grøftast ferdig på onsdag, og torsdag starter vi å leggja asfalt rundt banen, seier Odd Steinar Arnesen.

– Noko som betyr at vi allereie måndag 21. september står klar til å ta imot kunstgrasdekket, legg Johannes Hjønnevåg til.

 

Saman for meir aktivitet

Arnesen og Hjønnevåg er saman med Bjørn Olav Tveit, Wermund Vetrhus, Steinar Haugland, Michael Røssland, Ivar B. Arnesen og Harald Sunde, eldsjelene bak prosjektet. Dei såg at grusbanen sjeldan eller aldri vart nytta av ungdommar på fritida, og ville gjere noko med det.

– Vi såg at aktiviteten på grusbanen var veldig låg. Difor ville vi få opp eit tilbod som skal bidra til å auke aktiviteten på tvers av aldrar, og samtidig vera ein møteplass i bygda, seier Arnesen.

Med den nye niar-banen får uskedelingane opp eit alternativ til Heio. Sjølv om kampar og organiserte treningar framleis skal leggjast til Heio, er det mogleg å nytta den nye banen om det skulle bli naudsynt.

– Heio skal framleis bli brukt mest, men her får barn og unge eit tilbod dei kan nytta på fritida. Samtidig får skulen det fantastiske anlegget til fri bruk i skuletida, seier Arnesen.

 

Storslått aktivitetspark

Sjølv om kunstgrasbanen, etter planen, står ferdig i byrjinga av oktober, legg ikkje eldsjelene beina på bordet av den grunn. Banen er berre fyrste trinn i planen om ein flott aktivitetspark i Uskedalen. Parken skal by på ei aktivitetsløype med innlagte treningsapparat rundt heile området, klatre- og skatepark i enden med barnehagen og heilt opp mot Geilovegen.

– Aktivitetsparken vil gi heile bygda eit stort løft. Med skate- og klatrepark, fotballbane og turløypa er det aktivitetar for alle, seier Hjønnevåg.

– Skateparken ligg litt fram i tid, men det er allereie planlagt innkjøp av element som inntil vidare skal plasserast på skuleplassen, for så å bli flytta opp til parken når den tid kjem, legg Hjønnevåg til.