No har Trine og jentene lyst på 1. divisjonsspel

Inngangen til kampen var enkel for Strand-Ulv. Med siger var puljesigeren sikra, og laget kan delta i kvalifiseringsspelet for 1.

– Dette var veldig kjekt, for eg var spent før denne kampen. Han blei plutseleg litt viktig, den førsteplassen i puljen, seier Trine Sundfjord til Grenda etter at 3-0-sigeren i lokaloppgjeret i Kvinnherad Arena var ein realitet.

– Eg trur me har veldig lyst på 1. divisjonsspel no, seier Trine med glød i augo og eit teknisk atterhald i stemma.

Løyseleg

Atterhaldet går både på at klubbleiinga gir grønt lys på satsinga, samt at spelartroppen må avklarast.

– Me har snakka med desse spelarane som er i Bergen og dei som kjem tilbake frå TVN om neste år. Me har to spelarar som har søkt på skule i Førde, men dei ønskjer å spela for oss til neste år. Det blir litt overgangsavtalar med nokon elitelag, samtidig som me er redde for at dei blir sitjande på benken der, og det er heller ikkje tenleg for jentene. Det er kjekkare å spela, og då er det kanskje best å bli med oss, seier Sundfjord.

– Eg må snakka litt meir med klubbleiinga før me køyrer på, men me oppfattar at det er stemning for å gå for opprykk, legg ho til.

1. divisjon til neste år vil blant anna by to kampar i Bergen, samt TVN og Sandnes er også innanfor køyre-rekkevidde.

– Tromsø er langt, ja, men det er ikkje det enklaste å koma seg til Rival i Molde heller, påpeikar trenaren

Opprykksturneringa kjem nok til å by på eit Randaberg2 som truleg satsar på opprykk, og Tromsø2 kan spela om opprykk viss førstelaget går opp frå 1. divisjon.

God Trio-start

– Det første settet var skummelt, det såg ut som at me spelte med høge skuldrer og samtidig ser eg at jentene ville veldig mykje. Det var litt nettfeil og småknask i starten, og me låg jo under veldig lenge i begge dei første setta, seier ho.

Sundfjord såg mellom anna dotter Ronja Kirketeig servera ei med heftig serverekke der Trio vart henta opp frå 18-14 til 18-18, og Strand-Ulv heldt fram og sikra det avgjerande forspranget i slutten av settet, som enda 25-22.

Trio starta andresettet godt også, og hadde føringa med 9-4, men gjestene utlikna til 9-9, før dei stakk i frå.

– Trio er sterke i angrep og har eit par veldig sterke spelarar der, så me måtte pressa dei slik at me fekk tvinga leggaren til å springa. Då kjem ofte redningslegget ut til kant, forklarer Sundfjord.

– Me gjer halvanna sett der me er veldig gode, vurderer Trio-trenar Eirik Sævareid etter kampen.

– Det er små marginar i denne idretten, og første settet kunne vippa i vår favør. Når det er sagt, så er det eit godt lag me møter, og dei pressar oss slik at me ikkje får spelt vårt angrepsspel heilt slik me ønskjer, seier Sævareid til Grenda etter kampslutt.

Medan Strand-Ulv no er ferdig med sine kampar, har Trio tre igjen.

– Me har tatt poeng i dei kampane me skal. Strand-Ulv og Rossvoll har vore betre enn oss. Me har tre kampar igjen, og dei skal me fullføra på ein god måte, sluttar Sævareid.