NM-sølv til Atle Helland

Atle Helland skaut seg denne helga til ein imponerande sølvmedalje under innandørs-NM i bogeskyting i Lillestrøm

– Trass i at det er i 3D-klassen eg trivst best, så vart det jamn og god skyting heile helga. Så eg er veldig godt nøgd med resultatet, seier Atle Helland.

Han visste på førehand at han kunne hevda seg heilt i toppen av sin klasse, Coumpond 50, om han oppretthaldt konsentrasjonen heile helga. Og etter innleiingsskytinga laurdag føremiddag låg han som nummer to, eitt fattig poeng bak leiaren.

Med det var han klar for finaleomgangane, der utøvarane går opp mot kvarandre mann mot mann, og beste skyttar etter 15 piler tek seg vidare. Og frå 18 meters hald skaut Atle 142 poeng av 150 moglege i både 1/8-, kvart- og semifinalen. I finalen enda han på 141 poeng, og måtte med det sjå at Paul Ole Hagen frå Elverum tok gullet.

– Det er små marginar og lite som skal til for at du skyt deg vekk. Ein har ikkje råd til noko slurv, og heldigvis unngjekk eg det, seier Atle Helland.

Taisto Erkinharju og Terje Bakke frå Kvinnherad bogejegerklubb deltok også i norgesmeisterskapen.