NM-klare og regionsvinnarar
Strand-Ulv held fast på taket dei har på jentesida i Hordaland. Søndag kopierte J17-laget prestasjonen til J19 for to veker sidan, og vann suverent.
Publisert
Sist oppdatert
Fem strake 2-0-sigrar vart fasit for Strand-Ulv sine 17-årsjenter etter at regionsmeisterskapen for Hordaland vart sluttført søndag ettermiddag. Etter sigeren i semifinalen var NM-billetten sikra for Strand-Ulv. I finalen møtte dei arrangørklubben Rossvoll i Norheimsund, og med settsiffera 25-18 og 25-20 var vertane dei som kom nærast å gjera det vanskeleg for jentene til Trine Sundfjord.
Skade og sjukdom
Annonse
– Me mangla litt spelarar grunna sjukdom, og Lilli Aksnes-Øystese måtte reisa før finalen. Emma Sandvik Rødal kan ikkje hoppa, så ho spelte libero heile helga. Eg reknar med at me skal kunna stilla litt sterkare i NM enn det me gjorde her i helga, seier trenaren.
Sundfjord trener ein 16 jenter stor tropp. Skadar og sjukdom gjorde at laget hadde ti spelarar med på turneringa.
– Med 16 jenter er det vanskeleg å gje speletid til alle, og samtidig prøva ut nye posisjonar på jentene. Alle får framleis tilbod om å vera med til NM i Haugsund, men det er vanskeleg å gje alle mykje speletid, konstaterer ho.
Når det kjem til vanlege serierundar, melder Strand-Ulv på to lag.
Annonse
– Alle får spela mykje i serierundane, men det blir ikkje slik i RM og NM. Viss me skal stila høgt i desse turneringane, så blir det vanskeleg å kombinera i ambisjonar og lik speletid, legg Trine Sundfjord til.
Dei nemnde skadane og sjukdomstilfella ville nok merkast godt hos mange lag, men det handterte Strand-Ulv greitt.
– Det har ikkje vore eit stort puslespel, trass skadane. Me hadde god dekking i alle posisjonar, og fekk brukt alle spelarane, sluttar ho.
