NM-gull til Lilli og Emma
Gull til Hatlestrand og Varaldsøy, samt bronse til Varaldsøy. Det er den fantastiske fasiten i Norgesmeisterskapen i sandvolleyball for juniorar.
Publisert
Sist oppdatert
Som Grenda skreiv tidlegare laurdag, kvalifiserte duoen Lilli Tuften Aksnes-Øystese frå Hatlestrand og Emma Sandvik Rødal frå Varaldsøy seg til finalen i J18-klassen. Kampen gjekk av stabelen laurdag ettermiddag, og igjen var Lilli og Emma best. Dei vann 2-0 etter settsifra 21-18, 21-12 mot eit lag frå Haugesund/Randaberg.
Dermed kan Lilli og Emma kalla seg Norgesmeistrar!
Annonse
På vegen til gullet slo dei Maren Næss Våge frå Varaldsøy og Silje Vik frå Strandvik i ein høgdramatisk semifinale. I bronsefinalen var det Maren og Silje som vann ein jamn kamp, mot eit lag frå Vindafjord/Stavanger. Resultatet vart 2-1 og settsifra var 21-17, 18-21, 15-11. Maren tek også med seg heim sølvmedalje frå J17.
Vi gratulerer både med gull, sølv og bronse! Alle medaljevinnarane frå Kvinnherad representerer IL Strand-Ulv.
Det må også nemnast at 12 år gamle Sjur Aasgard frå Herøysundet tok ein sterk 4. plass i G16-klassen. Han og medspelaren i Bergen Sandvolleyballklubb vann fyrste sett 21-12 i bronsefinalen, men tapte dei to neste 20-22 og 10-15. Men Sjur kan uansett trøysta seg med gullet i G15-klassen tidlegare i veka!
Jens Aasgard frå Herøysundet spelar i skrivande stund finale i G21-klassen, så det kan bli endå meir gull til Kvinnherad.
