«Nasjonen» Hålandsdal hevda seg i verdseliten
Hålandsdal IL stilte som eigen nasjon i par-stafetten under Blinkfestivalen. To sysken Femsteinevik herja med store deler av verdseliten.
Publisert
Sist oppdatert
Laurdag kveld vart det arrangert parstafett i rulleskiskyting under Blinkfestivalen i Sandnes, direktesendt på NRK TV. Sterke nasjonar som Norge, Sverige, Frankrike og Tyskland stilte med fleire lag kvar, og med stort sett alle sine beste løparar til start. Midt oppi dette fann ein også Hålandsdal IL, for anledninga som eigen nasjon. På deira lag stilte Ragnhild og Martin Femsteinevik frå Hatlestrand.
Stafetten bestod av fire etappar, som alle inneheldt både liggjande og ståande skyting. For Hålandsdal gjekk Ragnhild Femsteinevik fyrste og tredje etappe, broder Martin andre og fjerde. Duoen unngjekk strafferundar, men måtte i alt bruka 12 ekstraskot. Syskena kom i mål på tida 27:38,5, noko som heldt til ein knallsterk 4. plass. Det var 44,2 sekundar etter det franske vinnarlaget.
Annonse
Frankrike 2 vart nummer to, medan Sverige/Norge 1 tok bronsen. Hålandsdal IL kom berre 4,8 sekundar etter tredjeplassen, etter å ha lege i medaljekampen heile tida. Martin Femsteinevik var faktisk nummer 3 etter siste skyting, men vart passert like før mål.
På NRK-sendinga vart det sagt mange godord om Femsteinevik-duoen.
– Dei kjem frå Hatlestrand med sine 450 innbyggjarar. Det er David mot Goliat her, det er gøy, sa kommentatoren.
– Laget til Hålandsdal har vore tapre som berre det, sa han også.
