Mmmmålet nærmar seg og Håvard leiar

Når det berre er to rundar att av Grendaligaen denne sesongen, har Håvard Sætrevik og hans Mmmmålet overteke leiinga.

Ein skulle jo tru at når nokon heilt friviljug vel å halda med Manchester United, så kan dei ikkje ha mykje peiling på fotball. Men den teorien får ein granat midtskips når ein ser Håvard Sætrevik sine resultat i Fantasy Premier League. Eventuelt er han berre unnataket som stadfestar regelen.

I alle fall leiar han no Grendaligaen, 14 poeng føre Yngve Sundfjord. I runde 36 hamna nemleg Grenda-redaktøren på ein sterk 7. plass med 112 poeng, noko Sundfjord ikkje greidde å utfordra. Den store skilnaden på kamphanane var Sætrevik sitt inspirerte val av Jackson i front.

– 14 poeng er inga leiing å snakka om, spesielt ikkje når vi går inn i den største dobbelrunden til no i år, ein runde dei aller fleste har spart Bench Boost til. Personleg har eg hatt flaks dei siste to rundane. Eg trefte på mykje, berre ikkje United-spelarane. Det ser ut til å kunna kosta mykje i neste runde også. Viss Fernandes er ute, så er det lite att der. Dessverre, kommenterer Sætrevik beskjedent.

Mange kampar

Guten har sjølvsagt peiling på fotball. Han har tusenvis av A-lagskampar for Leirvik Ballklubb, Solid og Rosendal, og har trena både herrar og damer i Rosendal. I tillegg leia han Grendaligaen ein runde før slutt seinast for to år sidan.

Men Sætrevik fryktar at eit par andre ringrevar kan bli tøffe å hanskast med.

– Eg trur Sundfjord, Bjørnevik og Bjørsvik alle kan klatra forbi i dei siste to rundane. Her er ingenting sikkert, seier han.

Runde 36 vart elles vunne av Torstein Monsen som fekk heile 129 poeng.