Mista opprykket på målskilnaden
Rosendal hadde opprykket inne i 45 minutt, men måtte sjå 6. divisjonsbilletten forsvinna mellom fingrane. Dette etter å ha takka nei då dommaren ville gje dei straffespark.
Publisert
Sist oppdatert
Premissen var tydeleg: siger i Tyssedal ville bety opprykk. Ved uavgjort eller tap, var skjebnen i Osterøy2 sine hender.
Gjestene starta kampen best, og hadde kontroll på det Odda2/Tyssedal prøvde på.
Annonse
Det var likevel noko forknytt over spelet til Rosendal, og spelarane lukkast ikkje med å sleppa seg skikkeleg laus.
Midtvegs i opningsomgangen sendte Martin Arnesen Anders Næs aleine med keeper, og målmaskinen var sikker. 1-0 og noko rolegare puls hos spelarar, støtteapparat og halvparten av eit talrikt publikum.
Gav bort straffe
Den mest omsnakka situasjonen i kampen kom på slutten av første omgang. Anders Næs vart på nytt sendt gjennom, og inne i 16-meteren drilla han av ein forsvarar og gjekk i bakken. Dommar blåste for straffe, men Næs stoppa han.
Annonse
– Nei, nei, nei, sa målscoraren, og forklarte dommaren at det ikkje var kontakt.
Med det gav han vekk sjansen til 2-0 på eit forbiletleg døme på fair play, men det skulle visa seg å vera opprykket som vart ofra.
For etter kvila var det ei kvassare utgåve av vertane som mønstra kunstgraset øvst i Tyssedal. Karsten Huse Bjørnebøle i Rosendal-målet måtte oftare i aksjon, men var sjanselaus då O2/T braut Rosendal og kom aleine mot han.
Med 20 minutt igjen av kampen byrja tida å gå fort for eit Rosendal-lag som måtte ha mål. Anders Næs kom til eit par halvsjansar, men det massive trykket makta dei ikkje å setja. Med det ebba både kampen og sesongen ut med å bli berre nesten. Uavgjort betydde at Osterøy2 sneik seg forbi Rosendal, og kneip opprykket på betre målskilnad.
