Martin skaut fullt hus – spent på fortsetjinga

– Det er mykje positivt å ta med seg frå dagens renn. Sjølv om eg skulle ynska at eg var sprekare fysisk. Det gjekk som det ofte gjer i opningsrennet tungt i løypa. Det har nok samanheng med at dette var vinterens fyrste renn, og eg som oftast treng nokre gjennomkøyringar før eg har toppfarten inne. Eg er ikkje bekymra for den biten ettersom eg ut utifrå føresetnadane har gjort ein bra treningsjobb gjennom sommaren og hausten, seier Martin etter rennet på laurdag.

Friskusen har brukt litt tid på å tilpassa seg den nye livssituasjonen. Men føler at det går betre og betre. Femsteinevik legg imidlertid ikkje skjul på at det er utfordrande å kombinera legestudiar med toppidrettssatsing. Han har lyst til å bevisa at det er mogleg, og har så langt klart det. Det mest krevjande med denne kombinasjonen er at det er vanskeleg å få kvilt og restituert seg godt nok når det går i eitt frå tidleg morgon til seint på kveld.

Veldig bevisst

– Eg er veldig bevisst på den biten. Det betingar at eg i periodar er nøydt til å trena mindre og ikkje minst smartare enn det eg har gjort. Det med tanke på å justera belastninga. Det har gjennom hausten vore litt prøving og feiling. Men eg føler at det har gått bra sjølv om eg ikkje får vore med på alle fellestreningane og samlingane til Holmenkollen Biatlon og teamet mitt. Eg er nøydt til å ta omsyn til at eg er legestudent og ikkje heiltids skiskyttar.

– Kva er det som får deg til å satsa vidare i ein så hektisk kvardag, Martin?

– Det er fyrst og fremst fordi eg er glad i å trena og trivst utruleg godt i miljøet. Trening har for lengst blitt ein livsstil, og så føler eg fortsett det er mogleg å bli betre på dei fleste område, sjølv om eg snart er 31 år. Eg likar å jobba med detaljar som kan gjera meg til ein betre skiskyttar. Prestasjonen i dag er vonleg ein indikasjon på at det kan bli ein artig vinter. Eg veit at eg har mykje meir inne fysisk enn det eg fekk tatt ut, seier Martin.

Slo fleire landslagsløparar

Martin Femsteinevik har for vane å prestera når han tar på seg startnummer. Opningsrennet på Sjusjøen var ikkje noko unnatak i så måte. Mange som er på landslag og private team som har ambisjonar om å representera Norge denne vinteren, vart sett på plass av Hatlestrand-utøvaren under dei flotte og vinterlege tilhøva. 1994-modellen beviste på standplass at han har dei ferdigheitene og den erfaringa som er så viktig for å treffa blinken.

Martin leste vinden bra, og fekk derfor ei hyggeleg oppleving på sprinten. Det lokale innslaget har som dei fleste andre som ynskjer å utfordra eliten, ein ambisjon om å konkurrera internasjonalt. Den eldste av dei fem skiskyttarsøskena veit at det kan vera mogleg å slå seg inn i ein IBU-cuptropp dersom alt klaffar. Sjølv om nivået i norsk herreskiskyting er høgare enn nokon gong. Det såg vi godt under sesongopninga i Mjøs-traktene.

– Eg er som sagt spent på fortsetjinga og gler meg til å gå nye renn, seier han som også denne vinteren har ambisjonar om å gjera det bra både i norgescupen og dei andre renna som han stiller opp i. Det at han klinkar til med fullt hus under vanskelege tilhøve, fortel også noko om den mentale styrken. Det var ikkje så veldig mange i det store startfeltet som fylte på sprinten. Martin si ståandeskyting var det skikkeleg klasse over.