Martin kombinerer skiskyting med krevjande medisinstudiar

– Eg har framleis ambisjonar om å bli ein betre skiskyttar. Men det har vorte meir krevjande etter at eg byrja på medisinstudiar i august. Universitetet i Oslo har ikkje studieløp tilpassa toppidrettsutøvarar, så eg må ta studiet på fulltid. Det kan bli utfordrande, seier energibunten til Grenda.

Martin fortel at det er fleire grunnar til at han no vil studera. Først og fremst fordi han lenge har hatt lyst til å bli lege. Samtidig kjenner han at det er på tide å tenkje på livet etter skiskyttarkarrieren.

Han har ingen planar om å gje seg med skiskyting med det første, men Martin, som har oppnådd mange gode resultat, innser at han ikkje lenger er ung og lovande. No er han godt over 30 år, og han kjem truleg ikkje til å halde fram like lenge på toppnivå som Ole Einar Bjørndalen, som var 45 år då han la opp.

Jaktar framleis utvikling

Martin Femsteinevik er ein perfeksjonist som stadig leitar etter detaljar som kan gjere han til ein betre skiskyttar. Det er viljen til å bli betre som gjer at han framleis trenar to gongar dagleg og har sett mykje anna på vent sidan slutten av tenåra for å satse på idretten. No skal han teste ut om det er mogleg å kombinere krevjande studiar og toppidrett.

– Det vil nok bli litt prøving og feiling. Eg merka allereie at ein ettermiddagsøkt etter ein lang dag på universitetet og sykkelturen heim i bratte motbakkar ikkje alltid gav så god effekt. Totalbelastninga blir viktigast framover, seier Martin.

Får ikkje kvilt like mykje

Etter at Martin vart student, er timeplanen tett frå tidleg morgon til seint på kveld. Han får ikkje lenger like mykje tid til kvile mellom treningsøktene, noko som kan bli ei utfordring. Likevel er han nøye med å få nok søvn for å oppretthalde prestasjonane.

– Det mest utfordrande blir nok å få kvilt nok mellom treningsøktene. Eg må vere utkvilt og ha overskot for å prestere på det nivået eg ønskjer. Eg ser at eg i større grad enn før må velje meg ut bestemte rennhelger. Det blir neppe mogleg å gjere det bra i alle norgescuprenna og NM, seier Martin.

IBU-cupambisjonar

Det store målet til Martin er framleis å kvalifisere seg til IBU-cupen, eller verdscup B, som han også kallar det. Han veit at konkurransen blir hardare for kvart år, men han ser ingen grunn til å justere ambisjonane.

– Det første målet er å gjere det bra på opningshelga, slik at eg kan kjempe om dei første plassane i IBU-cupen. Dersom eg held meg frisk og fullfører treningsjobben, trur eg det er mogleg, seier Martin, som framleis er ein del av Holmenkollen Biathlon. Han er godt nøgd med opplegget der.

– Eg får ikkje vore med på alt på grunn av studiane, men eg tek del i det eg rekk, avsluttar den målbevisste skiskyttaren, som ser fram til vintersesongen som startar om fem veker.