Martin er på gang igjen
Martin Femsteinevik har for vane å gjera det bra i den internasjonale skiskyttaropninga på Sjusjøen. Hatlestrand-guten gjorde også eit bra inntrykk i helga, trass i at det ikkje blei topplasseringar denne gongen.
Det var likevel mykje positivt å spora for Martin, som har hatt ein litt trøblete sesongoppkøyring etter at han ramla og brakk hand på sauesanking i haust. Det førte til at det blei ein liten månad utan rulleskitrening for 29-åringen. For ein som har ambisjonar om å prestere best mogeleg, var naturlegvis ikkje det heilt optimalt.
– Eg føler at det har ein bra treningshaust dersom me ser bort frå brotet. Det har blitt mange kvalitetsøkter, sa Martin som framleis er ein del av Holmenkollen Biatlon, det privatfinansierte teamet som både har gode utøvarar og eit bra sportsleg opplegg.
Annonse
Den eldste av dei fem Femsteinevik-søskena, er nøgd med oppfølginga han får i teamet som har base i Holmenkollen og Oslo.
Vanskelege føreforhold
– Eg føler eg får ei god gjennomkøyring, og får tatt ut det eg er god for på laurdagens sprint. Det er litt frustrerande at me har merkbart dårlegare ski enn landslagsløparane. Eg trur det kan bli den største konsekvensen av at det no er innført fluorforbod. Eg tapte mange meter og sekund i kvar einaste utforbakke. Det trass i at eg skøyta som best eg kunne, då dei andre sat i hockey, sa han.
Martin Femsteinevik ville ikkje bruka altfor mykje energi på at det var «feige» lag på sprinten. På søndag var det opphaldsvêr. Dermed ble ikkje skiforskjellane så store som dei var eitt døgn tidlegare. Martin gjennomførte nok ein god konkurranse. Han beviste at Hatlestrand og Hålandsdalen også i vinter har ein mann å rekna med på herresida. Målet er å vera med i kampen om plasser i IBU-cupen.
Annonse
Uttakskriteriene er endra
Martin Femsteinevik har fleire gonger vunne norgescuprenn utan å bli tatt ut til IBU-cupen. I vinter skal det bli litt enklare for dei som gjer det bra å koma seg utanlands på skiskyttarforbundet si rekning. For det skal vera utskiftingar i Wold Cup- og IBU-cuptroppane oftare enn det som har vore tilfelle. Det er gode nyhende for alle som har lyst til å representere Norge i internasjonale skiskyttarrenn.
– Eg tar med meg at kroppen fungerer og at det eg presterer på standplass er brukbart. Eg har framleis ein jobb å gjera i ståande før eg er heilt nøgd. Laurdagens sprint ble ein kraftprøve når tilhøva blei som dei blei. Eg tok ut det eg klarte, og litt til. Det var utfordrande å få restituert seg skikkeleg til søndagens renn, men eg fekk fleire gode svar og er glad sesongen er i gang, seier Martin.
