Marcus sikra seg karrierens aller første norgescuppoeng
Marcus Enes-Seberg fekk etterlengta oppturar i norgescuprennene på Voss. Både på laurdag og søndag sikra Omvikdalen-talentet seg norgescuppoeng.
– Det er godt å få bevist at eg har langt meir inne enn det resultata førre sesong kunne tyda på. Då sleit eg med å bli blant dei 100 beste i min klasse i norgescupsamanheng. 99. plass var det beste eg hadde, om eg ikkje huskar helt feil. Eg trente for mykje og gjekk på ein aldri så liten smell den første hausten og vinteren eg var på Hovden. Totalbelastninga blei for stor, og det bar resultata preg av då eg var klar for å konkurrera, seier Marcus.
Friskusen som fylte 18 år i januar, håper og trur han har lært av det som skjedde det første året han var junior. Den eldste av dei fire søskena i den svært så langrenns- og idrettsinteresserte familien, føler at han har kome styrka ut av det som skjedde i fjor. Han har blitt flinkare å lytte til kroppen etter at han blei tvungen til å ta ein pause. Denne hausten og vinteren har det meste gått etter planen på treningsfronten for den ambisiøse tenåringen frå Ænes.
Annonse
Første norgescuppoeng
Enes-Seberg hadde grunn til å være fornøgd med det han presterte i dei harde løypene på Voss. Mest tilfreds var han med laurdagens distanserenn i skøyting. Der gjekk han inn til 33. plass og henta sine aller første norgescuppoeng. Det var heller ikkje mye som mangla på at det blei norgescuppoeng og videre avansement på sprinten dagen i forvegen. Marcus avslutta vinterens andre norgescuphelg med å ta nye norgescuppoeng i distanserennet i klassisk.
– Eg er best i skøyting, og er veldig fornøgd med at eg også klarer å ta norgescuppoeng i klassisk. Det lover bra for resten av vinteren, seier han som hadde ambisjonar om å halda fram utviklinga, då han innleia denne sesongen.
Det har den unge skigymnasiasten klart. Han har også håp om å gå fort i junior-NM i Alta. Den flotte 33. plassen på Voss viser at Marcus er kapabel til det. Han har ein ambisjon om å sanka så mange norgescuppoeng i dei siste norgescuprennene at han får gå norgescupfinalen på Tolga rett før påske.
Annonse
– Eg skal no prøva å byggja opp ein formtopp til juniornorgesmeisterskapen i Alta, som blir arrangert i starten av mars, sa Marcus etter at han hadde brote ein barriere, og ikkje minst fått ein etterlengta opptur i løypenettet på Voss.
