Marcus med karrierebeste i NM i Alta
Marcus Enes-Seberg fekk ein etterlengta opptur i norgescuprenna på Voss for tre veker sidan. Det var ein opptur som heldt fram under junior-NM i Alta i helga.
18-åringen hadde all grunn til å vera fornøgd etter at han skøyta i mål til 31.plass og karrierebeste i juniorsamanheng. Den gode prestasjonen og plasseringa var eit nytt bevis på at Marcus har gjort mykje rett på treningsfronten det siste halvåret.
Omvikdalen-løparen har lært mykje av smellen han gjekk på for eitt år sidan. Han har blitt flinkare til å lytta til signala som kroppen sender ut, og får no utteljing for det.
Annonse
Skigymnasiasten var fornøgd etter fristilrennet i nord.
– Det er utruleg kjekt at eg lukkast såpass bra som eg gjer i sesongens viktigaste renn. Dei fleste prøver å prikka inn toppforma til junior-NM. Derfor heng ei god plassering her gjerne litt høgare enn i et norgescuprenn. Eg er mest fornøgd med at eg ikkje er lengre unna ei topp ti-plassering enn det eg er. Denne gongen skulle eg ikkje ha gått så veldig mykje fortare før eg var inne blant dei sju beste. Det er inspirerande å sjå at eg nærmar meg, sa Marcus til Grenda.
Prøver å utfordre de beste
18-åringen er noko så sjeldan som ein langrennsløpar frå Kvinnherad, som prøver å utfordre dei beste i landet i ein uthaldsidrett, kor Norge er best i verden. Marcus som kan skilta med gode plasseringar både i Ungdommens Holmenkollrenn og Hovedlandsrennet, ser ut til å halde fram den fine utviklinga i vinter, sjølv om han ikkje har noko resultatmål denne sesongen. Det handlar først og fremst om å byggja seg opp etter smellen han gjekk på hausten 2021.
Annonse
– Eg hadde forhåpningar om at eg skulle klara å prestera noko tilsvarande her i Alta som eg gjorde på Voss. Det at eg gjorde det betre, er svært gledeleg. Lysten og motivasjonen til å gjera ein god treningsjobb inn mot de to siste norgescuprenna blir i alle fall ikkje mindre, sa Enes-Seberg.
Han har i to av tre norgescuphelger i vinter bevist at toppnivået er høgt. Det er ikkje lengre så mye som skil han og dei som kjemper om NM-medaljar.
Fekk svi for tøff opning
– Eg opna tøft og fekk svi for det mot slutten. Med betre disponering så kunne eg for første gong ha vore inne blant dei 30 beste. Men eg bestemte meg å satse på ein hard opning i håp om at det ville halda heilt inn. Det er ikkje så lett å ta igjen dei sekunda ein eventuelt gir vekk i starten. Derfor satsa eg på ein slik strategi denne gongen, sa Marcus som likte seg i de harde løypene i nord.
