Lokale sigrar i Lysebotn Opp

Familiane Enes-Seberg frå Ænes og Femsteinevik frå Hatlestrand leverte sigersløp på rekkje og rad under Lysebotn Opp.

 

Den populære konkurransen Lysebotn Opp vart skipa til i går. Der var klubbane Omvikdalen IL og Hålandsdal IL godt representerte med lokale talet.

I klasse jenter 10 år og yngre deltok Celina Enes-Seberg. Løypa var 1 kilometer lang for desse deltakarane. Det vert ikkje kunngjort noko plasseringar i denne klassen, men resultatlista røper likevel at med tida 05.59,3 så var Celina den aller raskaste av dei 21 startande.

I same klasse for gutar starta broder Julian Enes-Seberg. Han klokka inn på 06.18,4. Han òg var blant dei raskaste.

Jenter 13 år gjekk 2 kilometer, og her er resultata rangerte. Nummer éin vart endå eit blad Enes-Seberg, nemleg Emilie. Ho fekk tida 11.43,4, og var så mykje som 49 sekundar føre nummer 2.

 

Seniorklassen

I gutar 15 år vart det utruleg nok endå ein siger til same familie. Marcus Enes-Seberg kunne ikkje vera dårlegare enn systrene, og vann på tida 09.25,0. Her var det svært tett i gullkampen, og nestemann var berre 7 tidel bak. Ytterlegare to gutar var berre 5 sekundar på etterskot.

Blant jenter 16 år deltok Guro Femsteinevik frå Hatlestrand. Ho vart nummer to med tida 10.39,6. Det var berre 12 sekundar etter gullvinnaren.

Ragnhild Femsteinevik stilte i seniorklassen, som måtte slita seg opp heile løypa. Ragnhild vart nummer 28 av 67 startande med tida 41.31,0. Ho var dermed 10.12 etter vinnaren, fenomenet Therese Johaug.

Bror Martin Femsteinevik vart på si side nummer 34 av 102 i herreklassen. Med 33.20,6 kom han i mål 04.46,9 bak skiesset Simen Hegstad Krüger.

 

Skiskyting

I dag har skiskyting i Sandnes stått på programmet. I 19-årsklassen vart Otto Femsteinevik nummer 14. Men syster Guro var aller raskast i kvalifiseringa i sin klasse. Ho kom i mål nesten 18 sekundar føre nummer 2.