Lokale gutar fekk møta fotballidolet

At den spanske fotballstjerna Raúl besøkte Salmon Eye på onsdag, er ei nyheit som gjekk sin sigersgang torsdag morgon, mellom anna høgt på fronten til VG. Men det var ikkje berre personellet på det vidgjetne visningssenteret med Michelin-restauranten Iris, eller kunstinstallasjonen som VG kalla det, som fekk helsa på Raúl og kona Mamen Sanz.

Det gjorde nemleg også brørne Sergio og Alejandro Vega frå Dimmelsvik, Sverre Jonassen frå Dimmelsvik, Nicholas Aasen-Pedersen frå Husnes og Aragon Thorkildsen Thorsen frå Valen. Kvintetten la ein lur plan for å få møta stjerna.

– Vi visste at han var her, og at dei budde på Fjordhotellet, fortel Sergio.

– Difor drog vi bort på hotellet før frukosten opna klokka 07.00 torsdag morgon og venta. Han kom litt etter klokka 10.00, legg han til.

Karane var høflege og heldt seg i bakgrunnen til Raúl hadde ete ferdig.

– Etterpå kom han bort til oss, skreiv autografar og stilte opp på bilete. Han var skikkeleg hyggeleg, rosar Sergio.

Fleire av gutane hadde Real Madrid-drakter med seg, som dei fekk Raúl sin signatur på. Alejandro hadde attpåtil ei drakt med namnet Raúl på ryggen!

På Skålabrua

Sidan Sergio og broren opphavleg er frå Spania, fekk dei spørsmål frå fotballhelten om kvar dei kom i frå og kva dei gjer i Rosendal. Vidare stadfesta Raúl at han hadde vore på Salmon Eye, og at han etter ei natt på våre kantar skulle vidare til Bergen. Utifrå bilete på Instagram, verkar det som at han og kona reiste med sjøfly til og frå Kvinnherad.

– Eg veit ikkje om han hadde vore på Baroniet, men det var nokon som hadde sett han på Skålabrua i går, så kanskje han gjekk opp dit også, opplyser Sergio.

Alle dei fem gutane er fotballinteresserte. Sergio er attpåtil stor tilhengar av Real Madrid, som er klubben Raúl gjorde seg mest bemerka i. Faktisk spelte han heile 16 sesongar for kvittrøyene. For å verkeleg understreka legendestatusen, er Raúl González Blanco, som er hans fulle namn, den som har spelt aller flest kampar for klubben, 741 i alt. Spissen er også deira tredje mestscorande gjennom tidene med 323 mål. Med Real Madrid vann han seks serietitlar og tre Champions League-titlar. Han scora til og med i to av dei sistnemnde finalane.

Raúl la opp i 2015, etter å ha avslutta karrieren i Schalke 04, Al Sadd og New York Cosmos.

47-åringen er no trenar for Real Madrid Castilla, altså reservelaget til Real Madrid. Dette er klubben også Martin Ødegaard spelte for.

Spelar på Trio

– Det var skikkeleg kjekt å få møta ein så kjent spelar. Eg fekk ikkje sett han medan han framleis var aktiv, men eg har sett han mykje på internett. Såleis var det eit førebilete eg fekk møta, seier Sergio, som sjølv er høgre back på juniorlaget til Trio. Utanom fotballen er han skuleelev på KVV.

Sergio og familien har budd i Kvinnherad i ti år. Opphavleg kjem dei frå Malaga, men har også slekt i Madrid.

– Interessa for Real Madrid har eg nok frå bestefaren min, fortel ein supernøgd ungdom.

Kvifor Raul og kona Mamen er på tur no, er ikkje kjend. Men godt mogleg er dei på reise for å feira sølvbryllaup, for dei gifta seg for 25 år sidan, i 1999. Saman har dei fire barn. Tre av ungane satsar på å bli fotballspelarar, dei også. Dottera Maria signerte i 2022 for Real Madrid sitt U15-lag.