Lokal 16-åring tatt ut til seniorlandslaget

– Eg trur eg er den yngste som har blitt tatt ut på damelandslaget, seier Lilli Tuften Øystese-Aksnes.

Når Grenda snakkar med ho er eleven som til dagleg går første året på Toppvolleyball Norge (TVN) i Sand på båten med retning til Stavanger. Der skal ho delta i Norgestouren i strandvolleyball.

Ung

Samlinga startar to veker før 2007-modellen fyller 17 år. Nestyngste i troppen er 19, medan resten er i 20-åra. Lilli er tatt ut som libero, saman med to andre.

– Eg har visst om plassen i troppen i to veker no. Først tenkte at det var stas å bli sett, og stas at eg er så god at eg får vera med. Så vart eg litt usikker, for dei er alle eldre enn meg, og eg skal vera saman med dei i lang tid, seier Lilli.

Lang tid er veldig korrekt vurdert av hatlestrandjenta. Samlinga varer frå 31. mai til 23. juni. Først to veker i Oslo, før turen går til Belgia og Nederland.

– Det er eit program for seniorlandslaget med trening og treningskampar. Det blir veldig gøy å reisa mykje, spela mot seniorar og få utvikla meg som spelar, meiner Lilli.

Eksamen?

Å vera så lenge vekke frå skulen kan by på utfordringar for ein førsteklassing på vidaregåande.

– Kom ikkje opp i skriftleg eksamen, og blir eg tatt ut til munnleg eksamen, så er det i så fall 12. juni. Då må eg reisa tilbake til skulen og ta den, og så returnera til landslagssamlinga. Eg får ta nettundervising ved denne samlinga, slik eg gjer når eg på andre samlingar. Dei legg det godt til rette for det på skulen, forsikrar ho.

Då ho starta på TVN i haust, var det 1. divisjonsspel som gjaldt. I vår spelte ho i eliteserien.

– Det er eigentleg ein regel om å ikkje bruka førsteklassingar på elitelaget, men eg har spelt der i vår, smiler ho.

Planen er to år til på Sand for å gjera ferdig vidaregåande. Først ein runde å spela Norgestour i sandvolley i Stavanger laurdag og søndag.

– Så er det tilbake til TVN og pakka meg ut av rommet. Men det er lenge til 31. mai, så eg får ta det som det kjem, smiler ho.