Leverte landets tredje beste hopp
Då Trio arrangerte seriestemne på onsdag, var det tresteg-konkurransen som skulle stela merksemda. To av deltakarane presterte nemleg landets tredje beste hopp hittil i år i kvar sin klasse.
Publisert
Sist oppdatert
– Totalt 31 deltakarar og topp stemning på ein fin kveld for friidrett, fortel Are Ulseth, leiar i IL Trio friidrett, etter onsdagens seriestemne på Husnes stadion.
Arrangørane hadde håpa på fleire deltakarar, men for einskilde kolliderte stemnet med kulturskule og ymse sommaravslutningar.
Annonse
Av dei fleire gode prestasjonane, må ein særleg trekkja fram det som skjedde i lengdegropa, der dei eldste hadde tresteg på programmet. Syskenbarna Ådne Opsanger-Tveit og Alexandra Tveit Rosendahl leverte landets tredje beste hopp i sine klassar.
«Ådne Opsanger-Tveit imponerte veldig, og det er vanskeleg å forstå kvifor han sjølv ikkje er meir begeistra for tresteg. For det har han gode føresetnadar for», heiter det i ei oppsummering på Trio si heimeside.
Raske på 100 meter
Alle hoppa hans var over 10 meter, med sterke 10,91 som det lengste. Det er tredje best i landet i klasse gutar 15 år, i følge friidrettsforbundet sin årsstatistikk. Alexandra landa på 9,44 som lengst, og det er tredje best i Norge i J14-klassen.
Annonse
Vi kan leggja til at duoen er rask også. Ådne sprang 100 meter på 12,8, medan Alexandra klokka inn på 14,2.
Elles vart det konkurrert i diskos, liten ball, lengde, 40 meter, 80 meter, 100 meter og 400 meter. Dei aller fleste deltakarane er medlemmer i Trio, men både Rosendal Turnlag og Uskedal Idrettslag stilte med to utøvarar kvar.
Sjå Grenda på tysdag for komplett resultatliste.
