Landslagstrenaren har stor tru på Guro

Trønderen fortel til Grenda at han ikkje vil leggja unødvendig press på dei unge skuldrane til Guro Femsteinevik. Han er oppteken av at Guro og dei andre på laget skal få utvikla seg utan alt for mykje stress. Kvam legg imidlertid ikkje skjul på at Femsteinevik si utviklingskurve peikar rett veg. Det er på langt nær alle som satsar som opplever det. Han håpar at det vil gje det lokale stortalentet eit løft at ho no har flytta til Lillehammer og kan få betre oppfølging.

– Med unnatak av éin utøvar så har alle jentene på laget base her på Lillehammer. Eg føler at det er alfa og omega både for jentene og laget. Spesielt med tanke på at vi to som er trenarar, kan følgja opp utøvarane nesten dagleg og vekentleg herifrå. Med tanke på utvikling så er kvardagen mykje viktigare enn flotte samlingsdøgn rundt om i landet. Eg har veldig tru på den modellen som vi har valt, og som Guro dreg nytte av i si satsing, seier han.

Raskt og sterkt tilbake

– Korleis føler du at Guro ligg an ved sesongopninga?

– Eg vil seia at ho er veldig godt i rute, sjølv om beinbrotet på seinsommaren førte til at ho måtte trena alternativt i ein periode. Slike skader passar alltid dårleg for toppidrettsutøvarar. Men det viktigaste var at ho slapp unna eit langt treningsavbrekk, og at ho etter kvart kunne trena alternativt. Ho måtte endre fokus i ein periode, og har etter mi mening kome styrka ut av det, seier landslagstrenaren.

Han fortel til lokalavisa at Guro er ein god skyttar. Det taler også til hennar fordel at ho i norsk målestokk er rask på standplass. Fjerdeårs-junioren har som oftast eit av dei kortaste og raskaste standplassopphalda. Det er som kjent sekundar å henta på å fyra av seriane raskt, sjølvsagt dersom skota sit der dei skal. Den nest yngste av Femsteinevik-søskena veit å treffa blinken når ho tek fatt på sine liggjande- eller ståandeseriar.

Mest å henta i sporet

– Det er nok i langrennssporet at ho har mest å henta i forhold til dei beste internasjonalt og dei beste i hennar klasse i Norge. Når det er sagt, så er det god progresjon i treningsarbeidet. Basert på fjorårsresultata, så har ho litt å gå på når det gjeld stabilitet i sporet til sine hardaste konkurrentar. Men vi har sett at ho har blitt både sterkare og meir uthaldande gjennom sommaren og hausten. Ho treng nok nokre år på å byggja opp kapasiteten som må ligga i botn for å ha moglegheit til å gje dei beste seniorane kamp, seier Andreas Kvam.

Han minner om at det å byggja opp ei uthaldenheit og fysisk base på dette nivået er ein langsiktig prosess som tek fleire år. Guro er etter det vi forstår godt i gang med den langsiktige jobben ho skal hausta av i seniorsamanheng. Landslagstrenar Andreas Kvam er oppteken av at det skal vera ein naturleg progresjon på det ho føretek seg på treningsfronten.

Det er lett å gå på ein treningssmell dersom det ikkje er ei naturleg auke i talet treningstimar. Dei som aukar treningsdosane for mykje får ofte trøbbel i forlenginga av det. Trenaren håpar og trur Guro med god intensitetsstyring skal unngå det dei neste åra. Ho er ein av fleire skiskyttarjenter som skiskyttarforbundet har valt å satsa litt ekstra på.