Landslagsendringar for Femsteinevik-søstrene

Tilværet på det beste skiskyttarlandslaget i verda kan vera eit hardt og nådelaust liv. Etter to sesongar på landslaget, og med VM i fjor som eit av høgdepunkta, har det periodevis gått trått for Ragnhild Femsteinevik (28) i sesongen som no er avslutta.

Korona sette eit hastig punktum for VM i Oberhof i fjor, og korona hindra ho i sesongstarten i vinter også. Følgjefeilen vart at formen aldri blei så god som han var året før, og ho kom seg aldri på verdscuplaget. No mistar ho plassen til Marthe Kråkstad Johansen, som einaste endringa i kvinnelandslaget.

For veslesøster Guro (20) har det vore motsett utvikling. Ho hadde ein tung førre sesong, men har i inneverande levert godt. Landslagsleiinga har såpass trua på ho at ho no er henta opp til rekruttlandslaget, eit lag som dei omstrukturerer litt.

– Rekrutt og U23 blir slått saman til eitt lag med 12 utøvarar, for å gje dei yngste jentene betre treningskvardag. Fire av jentene har rekruttstatus, mens resten er yngre jenter. Me ynskjer å ha dei samla så ofte som mogeleg i det daglege treningsarbeidet, seier landslagssjef Per Arne Botnan i ei pressemelding i samband med endringa.