La grunnlag for stafettgull med kanonetappe

Under mixstafetten i IBU-cupen søndag formiddag var Ragnhild Femsteinevik sett opp på andre etappe. Og for ein etappe ho skulle levera. Etter første etappe fekk Femsteinevik klappet på skuldra 12,3 sekund etter at Tsjekkia hadde veksla, men derifrå handla det meste om Hatlestrandjenta.

Stødig skyting og raske ski går aldri av moten i skiskyting, og med formen Ragnhild har fått på plass i slutten av sesongen, så merkar konkurrentane det. Ho brukte eit ekstraskot på å fylla blinkane på liggjande skyting, og låg på bakskia til Frankrike ut frå skytestadion. Ho tok raskt leiinga og auka jamt. Ut frå ståande skyting var leiinga 16 sekund, og ho gav gass vidare på siste runden.

Då ho veksla etter andre etappe var leiinga 33 sekund, ei leiing som lagvenninnene forvalta godt. Då Mats Øverby glei over målstreken, gjorde han det 1,15 minutt før Italia, og han sikra eit komfortabelt gull til Norge.