Kvalifiserte seg til VM i Abu Dhabi

Vidar Mehl lukkast i kvalifiseringa, og sikra seg plass i finalen i VM i E-sport-sykling.

Etter suksessen i veteran-VM, fortalde Vidar Mehl at hans neste mål var å kvalifisera seg til verdsmeisterskapen i E-sport sykling.

– Det er eit nytt opplegg i år. Dei 20 beste av 150 startande i kvalifiseringa skal samlast i Abu Dhabi til finalen i oktober. Det blir tøft, men eg håpar å kvalifisera meg, sa han til Grenda.

I fjor vart verdsmeisterskapen gjennomført ved at deltakarane sat heime og sykla, kopla opp mot ein felles dataserver. Vi hugsar ikkje minst at Ingeborg Hestad sykla i Dalheim i Omvikdalen, føre ein fullsett og heiande sal.

I år er som nemnt opplegget annleis. Den 6. september vart det gjennomført semifinalar. Vel 120 menn frå 27 nasjonar deltok. Dei måtte gjennom to virtuelle konkurransar. Fyrst ei løype på 9 kilometer med 1,5 km klatring. Her vart Vidar Mehl frå Omvikdalen nummer 4. Så var det klart for 4x4 kilometer, ein konkurranse der Vidar enda som nummer 6.

Dermed kom han blant dei 20 som kvalifiserte seg til finalen med god margin. Også eit par «Wild Card» får vera med i finalen.

Mest poeng

Den går føre seg i Abu Dhabi i Dei sameinte arabiske emirata den 26. oktober. Der blir alle deltakarane samla i same rom i ADNEC Marina Hall. Norge har berre to syklistar som får vera med; Vidar Mehl i herreklassen og Emma Julie Dyrhovden i kvinneklassen.

Finalen består av tre konkurransar. Fyrst ein kort sprint, deretter ni kilometer, og til slutt 4x4 kilometer. Den med flest poeng totalt blir verdsmeister.

Dette vert den fjerde utgåva av UCI Cycling Esports World Championships.