Koste seg på Rosendalsleikane

– Det har vore veldig kjekt, samstemte dei då Grenda sneik seg til nokre ord med dei mellom 200 meteren og kulestøytinga.

– Gøy å vera med, og så betyr det ingenting om du vinn eller taper, så lenge du er med, oppsummerte Nomi Sørensen Såtendal presist.

– Det har vore gøy begge dagane, meinte Anna Hermann Fossli.

Amalie Sundal Utne var berre med på søndagen, men ho hadde likevel hatt ein kjekk laurdag.

– Då hadde eg bursdag, forklarte 11-åringen.

Anna Hermann-Fossli (10) og Erle Marie Korsvold (11) tevlar for Uskedal IL, medan Nomi Sørensen Såtendal og Amilie Sundal Utne (begge 11) representerer Rosendal TL.

– Me har nokre treningar saman, og me har nokre kvar for oss. Og så driv me med litt andre idrettar også, forklarer jentene som også utøver andre idrettar.

Amalie, som driv med skiskyting på vinteren, trefte blant anna kjenningar frå Voss.

Etterpå skulle jentene inn i kiosken og raida det for wienerpølse.

– Dagens siste øving er pølseetingskonkurranse, gliste Erle Marie.

167 deltakarar

Dagleg leiar i Rosendal Turnlag Jonathan Varela Byrkjenes seier dette om Rosendalsleikane.

– Det vart arrangert på ein god måte. Folk var flinke, tok ansvar og løyste sine oppgåver på framifrå vis. Ein må løfta i lag, og det gjorde ein her. Tilbakemeldingane er at det var godt gjennomført. Vêret vart heldigvis betre enn varsla, og alt i alt er eg er godt nøgd, seier han.

Byrkjenes har også fått med seg at det vart eit par veldig gode resultat undervegs.

– Andrei Bringedal har beste tida i landet for 13-åringar på 60 meter utandørs med 8,19 og beste 200 meter med 26,45 her i stemnet. 4,82 i lengde er nest best i landet, éin cm bak son til Gøran Moen, påpeikar han.

Byrkjenes nemner også Alexandra Tveit Rosendahl sin 1,35 i høgde, som er 10. beste i J12-klassen i landet i år.

– I alt var det 167 som fekk startnummer, og inkludert dei i barneløpet som hadde 30 deltakarar. Moro! sluttar Byrkjenes.