Knallsterk prestasjon – ei halv sykkellengd frå VM-gull

Frå torsdag til søndag vart veteran-VM i sykling arrangert i danske Aalborg. Det byrja med temporitt på torsdag. Løypa var 33,3 kilometer lang, og baud på ei stigning på smålåtne 127 meter. I totalen vart Vidar Mehl nummer 12 med tida 41:32, noko som var 1:30 bak den belgiske vinnaren. Snitt-farten til Vidar var 47,85 kilometer i timen, medan bestemann greidde 49,66 km/t.

Men i klasse 35-39 år vart mannen, som opphavleg er frå Omvikdalen, nummer to, 52 sekundar bak vinnaren.

– Eg skal vera ærleg å seia at eg hadde store ambisjonar om gullet. Eg er skuffa over at eg ikkje hadde ein betre dag, men godt nøgd med farten og gjennomføringa. Dessutan var han som vann så rask at eg neppe hadde teke han sjølv på ein supergod dag, fortel Vidar Mehl når han måndag er attende på jobb hjå Gjøvik-firmaet Hunton Fiber AS, der han syslar med å konstruera byggjesett for hus.

Høgdramatisk

Søndag var det klart for ein høgdramatisk fellesstart på 152,9 kilometer, og med høgdeforskjell på i alt 1326 meter. Samanlagt vart Vidar Mehl nummer 147 av 539 startande. Tida enda på 3:34:45, noko som var 5:49 bak verdsmeisteren. Men i klasse menn 35-39 år vart han igjen nummer to, med same tid som vinnaren. Snitt-farten hans denne dagen var på 42,72 km/t.

– Eg veldig nøgd med dette løpet. Eg følte eg gjorde eit svært bra ritt reint prestasjonsmessigt, og formen var veldig god, seier Vidar.

Men han slår fast at det var «rimeleg kaotisk» undervegs. Det hadde både med deltakartalet og løypeprofilen å gjera.

– Det var 270 startande i vår gruppe. I tillegg tok vi igjen mange av dei som starta i gruppa før oss. Og så hadde vi dei over 60 år som køyrde ei kortare løype, men kom inn i vår løype på slutten. Så det var mykje folk der, og vi ana ikkje kva gruppe dei høyrde til, bortsett frå at vi kunne sjå det på fargen på startnummeret. Dessutan var det mykje smale vegar og mange kryss, seier 37-åringen.

Tidlegare proffar

I kaoset visste han ikkje kva plassering han eigentleg kjempa om; om det var gullet eller ein annan plass på pallen. Men Vidar trudde éin syklist i gruppa hadde fått eit bra forsprang.

– Med to mil igjen kom eg og tre andre av garde og køyrde som berre rakkaren. Vi visste ikkje korleis vi låg an, men sykla berre alt vi greidde. Éin kilometer før mål, tok vi plutseleg igjen to stykke som hadde fargen til vår gruppe. Då tenkte eg: «Å fy, vi køyrer om sigeren».

Dei seks slost gjennom to 90 graders svingar like før mål, etterfølgd av eit kort oppløp. Over målstreken var Vidar Mehl nummer to, berre ei halv sykkellengd bak vinnaren.

– To sølvmedaljar, det kan eg ikkje klaga på, for sølvet hengt høgt. Eg har fått ein anna syn på veteran-VM etter dette, for det er utruleg kor mange sprekingar det er i verda, smiler han.

For å illustrera kor sterk prestasjonen til Vidar Mehl er, kan vi opplysa at VM hadde over 3200 deltakarar frå heile 74 nasjonar. Fleire tidlegare proffar var med, deriblant den italienske spurtlegenda Mario Cipollini, som vann temporittet i klasse 55-59 år.

– Han sykla sjukt fort, kommenterer Vidar.

Abu Dhabi

Omvikdelingen har fram til no konkurrert på elitenivå, og dette var fyrste gong han stilte i veteran-VM.

– No har eg blitt ein eldre kar, og følte det var lov å delta i veteran-VM. Men det var ikkje berre å melda seg på, eg måtte til Danmark tidlegare i sommar for å kvalifisera meg, informerer han.

Komande fredag skal Vidar Mehl prøva å kvalifisera seg til VM i E-sport-sykling.

– Det er eit nytt opplegg i år. Dei 20 beste av 150 startande i kvalifiseringa skal samlast i Abu Dhabi til finalen i oktober. Det blir tøft, men eg håpar å kvalifisera meg, seier han.