Knallsterk innsats i Abu Dhabi - vart blant dei beste i VM

«Den store dagen er her», skreiv Vidar Mehl på si Facebookside nokre timar før verdsmeisterskapen braka laus i ein stor arena i Abu Dhabi.

«Mykje sjukdom dei siste vekene har fått kroppen min til å lida mykje. Eg vil likevel gje alt eg har og håpa på eit mirakel. Uansett er eg superstolt over å vera her som ein av 20 kvalifiserte syklistar», la han til.

Dette var fyrste gong verdsmeisterskapen i E-sykling vart arrangert med deltakarane samla i same rom, og arrangementet vart direktesendt på internett. Det dreia seg om ein ekte verdsmeisterskap, i regi av UCI – Det internasjonale sykkelforbundet.

Sprint og klatring

Finalen inneheldt tre øvingar. Fyrst stod sprinten på programmet. Syklistane sykla i 15 minuttar gjennom ei 1,6 kilometer lang rundløype. Inkludert i traseen var ein 300 meter lang sprint, og det var om å gjera å få best mogleg tid i denne sprinten. Utøvarane kunne prøva så mange gonger dei orka innan tidsfristen.

Vidar greidde ein knallsterk 4. plass, med tida 18,037 sekund. Dermed innkasserte han 17 poeng.

Neste øving heitte «The Strategist». No skulle deltakarane gjennom ei løype på 8,9 kilometer, som inneheld ein halvannan kilometer lang klatresekvens. Det vart delt ut poeng både før og etter klatring og ved målgang. Vidar Mehl, opphavleg frå Omvikdalen, men no busett på Gjøvik, kom i mål som nummer åtte. Etter to øvingar låg han på 6. plass med 66 poeng, medan leiaren hadde 86.

Alt skulle avgjerast i øvinga med namnet «All Out». Over fire rundar på fire kilometer vart det delt ut poeng etter plasseringa for kvar runde, og ved målgang var det dobbelt så mange poeng å henta.

Sliten

Vidar Mehl trilla over streken som sjuande mann. I samandraget vart han nummer seks med 133 poeng. Verdsmeister vart Jason Osborne frå Tyskland. Han sikra seg 177 poeng, etter å ha vore fullstendig suveren i den siste konkurransen.

Då konkurransen var slutt, kunne vi sjå ein sliten Vidar Mehl leggja seg på scena og pusta ut.

Grenda har ikkje fått tak i Vidar Mehl på søndag, men laurdag kveld la han ut følgjande helsing på Facebook: «Tusen takk for alle lukke til! Verkar som det hjelpte og at mirakelet eg måtte ha slo til! 6. beste i verda».