Klubbrekord for Alexandra

41 deltakarar stilte på Husnes stadion 15. mai, med mange flotte prestasjonar, inkludert ein klubbrekord.

– Me trudde ei stund det var snakk om to, men ein sjekk i historiebøkene viser at det var berre nesten, rapporterer friidrettsleiar i Trio Are Ulseth.

– Alexandra Tveit Rosendahl fyller 14 i år, men slo likefullt sin eigen klubbrekord frå i fjor på 600 meter. Ny rekord er på 1.48,4. Nær to sekund betre enn den gamle, opplyser Ulseth.

Også på 5.000 meter låg Holmfridur Adalsteinsdottir an til ei veldig god tid, og eldre herrar som bivåna hevda ifølgje Ulseth at dette måtte bli ny Trio-rekord.

– Frida sprang inn på 20.23,6. Og ein sjekk av rekordtidene viser at Bente Hellevik sin klubbrekord på distansen er på 20.20,2. Close, but no cigar. Ingen av dei røyker sigar uansett, kommenterer friidrettsleiaren vidare, som er nøgd med frammøtet, spesielt sidan 5.-6.klassen var fråverande grunna skuletur.