Klart for Kvinnheradløpet

Søndag 4. oktober går det 34. Kvinnheradløpet av stabelen i Rosendal.

Det er andre året at det tradisjonsrike løpet går i den nye 5,8 kilometer lange traseen.

– Den nye løypa var ein kjempesuksess. Den er veleigna for alt og alle, anten ein tar turen med motorisert rullestol eller barnevogn. Vi fekk fantastiske tilbakemeldingar både frå deltakarar i tur- og i tidsklassen, seier Lars Røysland frå turgruppa til Rosendal Turnlag.

I fjor var det 49 deltakarar i tidsklassen, best i kvinneklassen var Veslemøy Haugland, mens Erlend Jensen var sterkast i herreklassen. Arrangørane satsar på å få like mange på startstreken i år, og oppmodar yngre og eldre mosjonistar til å stilla i tidsklassen.

– Kvinnheradløpet er eit «glad-arrangement» og ein møteplass der folk trimmar og hygger seg samtidig. Vi håper at mange vel å leggja søndag formiddag til løypene, og satsar på at det kjem minst like mange som i fjor, seier Røysland til Grenda.