Klart for elitehandball i Kvinnherad Arena
Det har vore eit ynske lenge, og no er det klart. Den 24. mars møtest to av Norges beste handball-lag til seriekamp i Kvinnherad Arena.
Publisert
Handballinteresserte bør allereie no setja av søndag 24. mars i kalenderen. Då skal nemleg Bergen Håndball (tidlegare Fyllingen) og Sandnes reisa til Husnes for å spela kamp i den såkalla Rema1000-ligaen. Dette er øvste nivå for herre-handball i Norge. Per i dag ligg Bergen som nummer 8 på tabellen, medan Sandnes ligg på plassen bak.
Arrangementet på Husnes skjer i eit samarbeid mellom Kvinnherad Handballklubb (KHK) og Kvinnherad Arena.
Annonse
– Det er KHK som tek den tyngste lasta i samband med gjennomføringa av kampen, så dei skal ha all ære for dette. Dei er både svært kompetente og motiverte. Dette blir gøy, seier Daidalos Dahle, dagleg leiar i Kvinnherad Arena, når Grenda ringer.
Kan bli årleg
Dahle fortel at han har jobba for å få eit slikt arrangement til Kvinnherad Arena sidan fyrste dag på jobb, og tykkjer sjølvsagt det er stor stas å lukkast.
– Ja, det er kjempestas. Det er veldig viktig for oss at dette skal vera ein arena som skal romma både topp- og breiddeidrett. Ein slik toppkamp blir noko nytt, men vi har veldig lyst å prøva. Dette blir ei god anledning for å visa at vi klarar det, og viss det funkar, så er det godt mogleg at vi får ein slik kamp kvart år, filosoferer Daidalos Dahle, som samstundes takkar Norges håndballforbund for tillita.
