Klare sigrar trass ungt lag

– Det gjekk bra i helga. Eg var litt bekymra på førehand sidan me mangla ein del spelarar, men dei me hadde gjorde ein kjempejobb i begge kampane, fortel Trine Sundfjord til Grenda om prestasjonane til Strand Ulv-damene.

Til laurdagskampen fekk dei henta inn Leah Hjortland på 13 år, slik at dei fylde ut dommarkortet på greitt vis.

– Ho spelte veldig bra og serva inn mange poeng for oss. Snittalderen på dei som spelte på laurdag var 15 år, så det var eit veldig ungt lag. Ein del måtte også spela andre posisjonar enn dei pleier, sidan me hadde ein leggar, fem midtar og ein kant som spelte libero. Det er utruleg imponerande at dei kan bytte posisjonar sånn og likevel spela kjempegodt, skryt Sundfjord.

På søndagen måtte Leah Hjortland spela J15-kamp, men Silje Vik rakk heim og kunne vera med.

– Dei spelte godt den kampen òg. Gjennomgåande var det veldig mykje bra serving begge dagar, noko som gjer jobben lettare for oss, sluttar trenaren.

Formalfeil av heimelaget

Trio reiste laurdag til Øystese for å møta serieleiar Rossvoll. Det blei 3-1-tap, men dei to siste setta vart tapt med minst mogeleg margin (28-26 og 25-23). Den eine settsigeren (25-0) til bortelaget skuldast faktisk ein formalfeil. Den eine spelaren som var i aksjon for Rossvoll, var nemleg ikkje ført på kampskjemaet av heimelaget. Trio varsla domarane om tabben.

– Me dreit oss ut, rett og slett. Det var kjedeleg for ho, sa Agnethe Lie Øyri, ein av 10 korrekt loggførte spelarar i Rossvoll-troppen, til Hordaland Folkeblad etter kampen.

Det blir i lokalavisa for Kvam peika på at det var ein kjekk kamp med lange ballvekslingar og godt spel i begge lag.

– Sjølv om me drog det i land, var det ingen enkel kamp, sa Øyri vidare til Hordaland Folkeblad.

Trio-trenar Eirik Sævareid kjenner seg igjen i Øyri si skildring.

– Me møtte eit godt lag der inne, og me brukte tid for å koma i gang. Dermed fekk me eit førstesett der. Andresettet var relativt jamt, men me fekk settet på ein formalfeil frå Rossvoll. Me hadde to settballar i tredjesettet, og trykker godt i serve og er gode i mottak. Likevel klarer me ikkje å avgjera i vår favør, seier Eirik Sævareid til Grenda om kampen.

Han fortel Rossvoll førte mest i fjerdesettet, men at Trio-damene henta seg godt inn på slutten.

– Me gjer ein bra kamp på mange område, spesielt i servemottak. Rossvoll er eit bra lag, og ledar klart divisjonen. Me presterer godt og må sjå på prestasjonane våre ut frå kor me er, og me har hatt framgang gjennom sesongen, vurderer Sævareid.