Klar for NM-finale – kan bli norsk meister

Storhamar reiste frå Hamar til Oslo for å spela semifinale mot Oppsal. Det var verdt turen, kan ein trygt seia. Kampen starta jamt, og etter 22 minuttar stod det uavgjort 9-9. Men så overtok gjestene fullstendig, og leia 17-10 til pause. Til slutt vart resultatet 30-22. Tina Abdulla frå Husnes spelte ein veldig god kamp, og vart gultrøyene sin toppscorar med seks mål.

Dermed har Storhamar igjen kvalifisert seg til NM-finale i handball, slik dei har gjort tre gonger før, i 2018, 2019 og 2023. Årets utgåve går av stabelen i Unity Arena i Bærum søndag 29. desember. Storhamar har aldri vunne finalen, men truleg har sjansen aldri vore større enn no. Motstandar vert gamleklubben til Tina Abdulla, Tertnes. Bergensarane vann soleklart 30-19 over Byåsen. Tina er elles tysk seriemeister med Borussia Dortmund frå tidlegare.

Gode vilkår

– Dette betyr at vi nok ein gong har sett oss i posisjon til å slost om ein tittel. Vi har slege ut den desidert største utfordraren (Vipers i kvartfinalen). Vi har gode vilkår i ein finale, så dette her var viktig og ikkje minst ei lette, seier Storhamar-trener Kenneth Gabrielsen til klubben si heimeside.

Komande laurdag skal Storhamar spela siste heimekamp i Champions League før jul. Då kjem kroatiske Podravka til Obos Arena.