Kjempesuksess for ultraløp – seks deltakarar sprang 80 km

Laurdag var det klart for den fyrste utgåva av det som primus motor Stine Hatteberg antydar vil få namnet Rosendal ultra. Deltakarane skulle springe ei løype på 6,7 kilometer – frå samfunnshuset, gjennom Omshagen, Baronihagen, Steinparken, Målet og attende gjennom Omshagen til stadion – så mange gonger dei orka frå klokka 07.00 om morgonen til 19.00 om kvelden. Rundane starta kvar heile time, og då måtte ein vera klar til å leggja i veg igjen.

Dette ville mange vera med på.

– Då eg kom inn døra klokka ti på sju om morgonen og såg alle dei som hadde kome, vart eg heilt mållaus. Det var nesten ikkje parkeringsplass heller, så eg tenkte berre «hæ, kva skjer?». Då vi starta klokka 07 var det allereie 25 deltakarar. Det var heilt utruleg og kjempegøy, nærast jublar Stine Hatteberg etter suksessen.

Overleva

Grenda tok turen innom samfunnshuset litt før klokka 13.00. Då sat løparane i gangen utanfor gymsalen. Nokon prøvde å mjuka opp beina, andre nytta sjansen til litt energipåfyll. Ute sipa regnet ned, men humøret var på topp.

– Eg trur vi skulle hatt ein fysioterapeut her etter kvart, spøkte Stine Hatteberg.

I alt var det med 32 deltakarar. To av dei hadde gitt seg på dåverande tidspunkt.

– Kva er målet for dagen? spurde vi Jørn Hjelmeland då han gjorde seg klar til neste runde.

– Målet er passert, humra han.

Stine Hatteberg fekk same spørsmål,

– Å overleva, meinte husbonden Johannes.

– Eg tek éin runde om gangen. Det går bra enno, det vil seia - eg kjenner det godt i beina no, svarte Stine ærleg.

Raskare og raskare

Johannes Heien våga å seia på førehand at han satsa på 80 kilometer.

– Eg har tolt det bra så langt. No skal vi byrja på sjuande runden, opplyste han.

– Det er 12 som er målet?

– Joda, joda, vi går for det.

– Er det fleire som satsar på 12 rundar?

– Eg trur i alle fall det er fleire som vil prøva enn dei som seier det høgt, smilte Johannes Heien.

Karen frå Utåker var kjempenøgd med både løypa og løpet.

– Eg visste dette ville bli ein suksess, for det treff så mange. Det er utruleg kjekt, slo han fast.

Det einaste han var bekymra for, var tidsbruken, eller snarare mangel på tidsbruk.

– Litt «diverre» kanskje, så går det raskare og raskare. Planen var å bruka 45 minuttar, men den siste tok eg på 38. Så det går ganske raskt, sa han.

Den tendensen heldt seg heile dagen, for resultata viser at Johannes Heien sprang kvar einaste runde raskare enn den førre. Han starta på 44.40 og slutta på 28.07. Heien vann dermed begge konkurransane; beste totaltid og beste tid på sisterunden.

Supersosialt

Ute i felten på den 7. runden møtte Grenda løparane då dei kom ut av baronihagen og passerte den gamle smia. Då leia forfattar Anders Totland an i feltet. Sigurd Hatteberg såg ut til å ha så stor fart at han måtte langt ut på bakken, før han sikta seg inn på alleen igjen.

– Eg har så glatte sko, forklarte han.

Det skulle visa seg at seks av deltakarane stod heile distansen.

– Eg trur alle sprang meir enn kva dei fyrst hadde tenkt seg. Dei tenkte nok «nei, dette er siste runden», men så etter ti minuttar pause, la dei i veg igjen. Det var supersosialt å vera med, for det var alltid nokon å jogga med, og sidan tempoet var så roleg, var det også råd å prata. Eg hadde aldri trudd det skulle vera så gøy, vurderer Stine Hatteberg.

Resultatlista ser slikt ut:

1. Johannes Heien

2. Marta Teigen Varanes

3. Gørill Samland Eik

4. Stine Hatteberg

5. Holmfridur Adalsteinsdottir

6. Cathrin Mehl

– Legg merke til at det er flest damer, kommenterer Stine Hatteberg.

Brannalarm

– Korleis er formen no etterpå?

– Eigentleg overraskande bra. Eg fekk ein brannalarm klokka 07. på søndag, og då eg hoppa ned på golvet, kjende eg det litt, ler ho.

Løpet på laurdag var i utgangspunktet berre eit testløp. Alvoret er fyrst 15. mars, då ein skal gjennomføra løpet på nytt, og vonleg med deltakarar frå fjern og nær. Det er likevel mogleg at romjulsløpet kan bli repetert.

– Mange er heime i romjula, så kanskje det kan bli ein tradisjon. Veldig kjekt at vi hadde deltakarar frå heile kommunen, seier Stine Hatteberg.