Kjempestart for Ragnhild: Slo norske og utanlandske landslagsstjerner
Eit stygt fall på rulleski gjorde at Ragnhild Femsteinevik si sesongopning på Sjusjøen hang i ein tynn tråd. Heldigvis handterte 29-åringen smertene og den vonde skuldra, og stilte til start.
Hålandsdalen-utøvaren varta opp med eit kjempeløp, og gjekk inn til ein knallsterk femteplass. Det var tre norske og éin utanlandsk løpar føre ho på resultatlista. Landslagsstjerner som Karoline Knotten, Juni Arnekleiv og Ida Lien var blant dei som måtte sjå seg slått av Femsteinevik i dei kuperte løypene. Ho var tre tidelar unna fjerdeplassen, og opp til Ingrid Landmark Tandrevold skilte det 44 sekund i det flotte vintervêret.
– Eg er veldig nøgd med måten eg løyser det på i dag. Spesielt med tanke på at det var ein del vind og dette var opningsrennet. Det er gjerne litt ekstra spenning og nervar i vinterens fyrste konkurranse, sa Ragnhild etter at ho hadde kapra femteplassen.
Annonse
Ho måtte tola ein strafferunde på begge skytingane. Farten i sporet var som vanleg bra, sjølv om ho har gått betre langrenn. Ho har mest sannsynleg eitt gir til inne når det dreg seg til.
Bra treningsgrunnlag
– Eg vil seia at det meste har gått på skinner fram til eg falt og skada skuldra på rulleski. Det var heldigvis ikkje noko brot. Men eg vart kraftig forslått, og har i etterkant hatt smerter. Eg kunne heldigvis stilla til start, sa Ragnhild, som har vore solid på trening gjennom hausten.
Derfor var det mange som forventa at ho skulle vera med i tetbiletet, før ho falt og skada seg. Då var det fleire som var spente på korleis det ville gå.
Annonse
Ragnhild Femsteinevik konkluderte etter sprinten på Sjusjøen at ho fekk dei svara ho håpa på. Det gir sjølvtillit når ein utklassar ein så god og profilert utøvar som Dorotea Wierer og set ho ettertrykkeleg på plass. Den italienske superstjerna, som har både OL- og VM-gull, var ein av dei som var sjanselaus til å hamla opp med det lokale stjerneskotet. Sjølv om Femsteinevik måtte ut i to strafferundar.
Nytt renn på søndag
No blir utfordringa og målet å følgja opp på fellesstarten.
– Eg gler meg til søndagens fellesstart når formen er så god som den er. Mitt primære mål blir å få til gode gjennomkøyringar på standplass, sa Ragnhild, som har heva både topp og botnnivået på trening det siste halvåret. Treffprosenten har aldri vore så høg. No handlar det om å få overført dei gode opplevingane på trening til renn. Dersom stortalentet lukkast med det, så vil ho bli vanskeleg å slå i renna i vinter.
Tekst: Svein Halvor Moe
