KHK-jentene fekk trening av proffane
Dagen før eliteseriekampen mellom Bergen Håndball og Sandnes fekk 45 KHK-spelarar topp trening av Bergen-spelarane.
Publisert
Sist oppdatert
Laurdag tok Kvinnherad Handballklubb i mot spelarar og støtteapparat frå Idrettslaget Bergen Håndball i samband med at Bergen skal møta Sandnes i Rema1000-serien søndag 24. mars i Kvinnherad Arena. Først tok bergensarane ei treningsøkt for seg sjølve, så stilte spelarane opp som trenere for KHK-jentene.
– Frå KHK var det 45 spelarar i alderen 12-17 år som deltok, og det var også med fem spelarar frå Odda Håndball i same aldersklasse. I tillegg deltok sju trenere frå KHK, og alle fekk ein god dose inspirasjon, fortel styreleiar for og trenar i KHK Daniel Haugland.
Annonse
– Herrelaget frå Bergen var både positive og energiske, og at dette var absolutt ein fulltreffar. Spelarane fekk gjennomgå ei økt i regi av Bergen Håndball som heldt både høgt tempo og nivå. Tilbakemeldingane frå våre jenter var at dette var ei særdeles kjekk trening, som absolutt gav meirsmak, seier Haugland vidare.
Han fekk med seg treninga til Bergen Håndball, før dei hadde økta med jentene.
– Etter å ha kikka på treningsøkta deira, så er det heilt klart at me søndag ettermiddag kan forventa ein kamp med mykje trøkk og harde taklinger. Dette kjem til å bli kjempeunderhaldning, lovar handballeiaren.
