KHK fyller opp buss for å sjå Tina
Handballklubben er i ferd med å fylla opp ein stor buss for å reisa og sjå Tina Abdulla møta gamleklubben Tertnes på onsdag.
Publisert
Sist oppdatert
– Førebels er me 50 som skal på Tertnes - Storhamar. Me veit Tina set pris på det, og at ho syns det er kjempegøy at me er der. Me var ein gjeng og såg ho mot Fana, som var veldig kjekt. Denne gongen kliner me til, og låner ein stor buss som me fyller opp, seier Dagfinn Gjerde i Kvinnherad Handballklubb.
Viste igjen
Annonse
Då dei såg Tina Abdulla og Storhamar mot Fana, stilte KHK-bataljonen med trommer og god lyd, og sytte for god stemning.
– Der var me kring ein tredjedel av publikum. Det er lov å laga lyd på handballkampar, og det skal me gjera på onsdag også. Tina takka for støtta etter kampen i Fana, og me satsar på at ho har litt tid til oss etter kampen no også, seier Gjerde som i tillegg til å vera trenar for J14, også med i KHK-styret.
– Me må prøva å finna på litt ting utanom berre treningane, seier han om initiativet.
Etter at handballen har fått ta i bruk Kvinnherad Arena, har det fått eit løft, meiner Gjerde.
Annonse
– Det doblar treningstimane våre, og det viser at det var heilt nødvendig. Me har jobba med ny hall i 10-12 år, og klubben har vore primus motor for å få det realisert. Kvinnherad Arena har vore kjempebra for oss, og det er gull å få samla så mange aktivitetar på ein plass, med turn, klatring og dei andre, seier Gjerde.
Det er dei eldste jentene i klubben, laga frå J13 opp til J16, som får tilbodet om turen.
– Det er utruleg gøy å sjå handball, og ikkje minst kjekt å sjå kampar på det nivået Tina spelar på. Og det er berre å hiva seg med på turen til Åsane, der Tertnes spelar, sluttar Dagfinn Gjerde.
