Cecilie Medhaug (i midten) kunne ta i mot jublande lagkameratar etter å ha dunka inn 2-1.

Morten Nygård

Kanonscoringar sendte J19 til topps

Rosendal sitt J19-lag kan bli krinsmeistrar. Fleire drøymemål i søndagens kamp sendte laget til topps på tabellen.

Morten Nygård Journalist

Publisert 22.10.2024 - 19:30

Søndag ettermiddag møttest Rosendal og Askøy til dyst på naturgraset hjå fyrstnemnde. Med eit godt resultat der ville kvittrøyene få ein brukbar sjanse til å vinna heile serien og bli krinsmeistrar. I vårsesongen enda Rosendal som nummer to på tabellen, etter tre sigrar og tre uavgjorte. I haust er dei beste laga frå dei ulike avdelingane samla til eit nytt seriespel.

Vertane var klart best mot Askøy, og hadde gjennom heile fyrste omgangen eit visst trykk, utan at det vart mange store sjansar ut av det. Etter ein halvtime fann Ronja Hatteberg Huke ut at ho like godt kunne prøva eit skot, sjølv om vinkelen var vanskeleg. Frå kanten av 16-meteren sendt ho ballen knallhardt i mål, nesten klint i krysset.

Annonse

– Årets mål, vart det hevda på sidelinja.

Ronja Hatteberg Huke fyrer av i 2. omgang. Netkjenning fekk ho før pause.

Heilt ope

Gleda varte imidlertid ikkje lenge, for seks minuttar seinare utlikna gjestene, ganske ut av ingenting. Men så var det Cecilie Medhaug sin tur til å finna fram skotfoten. Ho dundra til frå 18 meter, og ballen fôr i ein boge over keeper og så vidt på rett side av tverrliggjaren. Dermed stod det 2-1 til heimelaget halvvegs.

I 2. omgang fortsette dominansen. Etter 51 minuttar vart det 3-1, igjen etter nydeleg spel. Eit strålande innlegg frå venstre kant av Siri Lorentzen-Furdal enda hjå ei totalt umarkert Frøya S. Hatteberg. Ho hadde få problem med å scora. Heller ikkje Emilie S. Aaseth hadde vanskar då ho ekspederte eit straffespark i mål sju minuttar seinare.

Annonse

Kampens siste scoring vart ikkje noko anna enn eit trøystemål for Askøy, for vertane hadde tilnærma full kontroll også den siste halvtimen. Rosendal har dermed overteke tabelltoppen, med éin kamp igjen. Den vert spela heime mot Flaktveit komande søndag. Kven som vert krinsmeister er framleis heilt ope, for både Kvernbit, Voss og Trott/Solid/Stord vil ha eit ord med i laget.

Veldig spennande

– Eg synest vi hadde god kontroll i store deler av fyrste omgang, men det merkast at vi måtte omrokkera litt på grunn av jobb og militæret. Vi hadde også nokon ute med sjukdom og skade, oppsummerer trenar Lise Christensen Sætrevik.

– Det er ein god «go» i dei som er her, supplerer hjelpetrenar Magne Skår.

I ein kamp med mange gode prestasjonar, har Sætrevik likevel funne ut kven som var aller best.

– Emilie var heilt fantastisk i dag. Ho var banens beste, slår ho fast.

Annonse

No ser trenaren fram til ein dramatisk innspurt.

– Mykje kan skje, og det er ein veldig spennande tabell, meiner Lise C. Sætrevik, og legg til at Rosendal berre har eitt tap i år, og det var i ein kamp der dei mangla keeper og måtte setja ein utespelar i mål.

– Vi har veldig mange gode fotballspelarar. Dei er både raske, sterke, tekniske og har gode skotbein, understrekar ho.

– Er det håp om å bli krinsmeister?

– Vi får sjå når vi er ferdige og summera opp til slutt. Vi er der vi er, seier Magne Skår nøkternt.