Kan bli historisk

Søndag spelte dei norske volleyballherrane fyrste kvalifiseringskampen til Europameisterskapen i 2026. I Arendal vann dei 3-0 over Montenegro, etter settsifra. 25-19, 28-26, 25-20. Lars Kristian Ekeland frå Hatlestrand var i oppvarming, men kom aldri innpå banen i den TV2-sendte kampen.

– Det var mest fordi dei som var med gjorde jobben, så det var ikkje behov for å byta, seier han til Grenda når han måndag føremiddag sit i landslagsbussen på veg til Oslo. Der skal troppen trena nokre dagar, før neste kvalifiseringskamp mot Tsjekkia i Praha neste torsdag.

Sjølv om sigeren over Montenegro til slutt var kontrollert, var det utan tvil ein god motstandar.

– Vi har sett mykje på dei, og var klar over kva som venta oss. Men vi veit vi er gode sjølv når spelet sit. Det var ekstremt deileg å vinna og få ein veldig god start på kvalifiseringa, vurderer Ekeland.

20-årigen er spent føre kampen mot Tsjekkia.

– Det blir nok vesentleg tøffare, for dei har eit veldig bra lag, seier han.

– Får du speletid i denne kampen, trur du?

– Eg er i alle fall alltid klar. Då vi spelte Nordic Cup tidlegare i sommar mot Sverige, Danmark og England, var eg innpå i alle kampane, opplyser Lars Kristian.

Hektisk sommar

Som nemnt har Norge aldri delteke i EM i volleyball. Det er såleis ei bragd om dagens lag endeleg lukkast.

– Norge har kome til 2. kvalikrunde, men aldri til sluttspelet. Så det blir historisk viss vi får det til. Det blir spennande, seier Lars Kristian Ekeland.

– Men det er ein tøff veg?

– Ja, det er det, men moglegheita har nok ikkje vore så stor på lenge. Det er tre lag i kvar gruppe, og det beste laget i kvar går direkte vidare. I tillegg går fem av dei sju som kjem på andre plass vidare.

Det har vore ein hektisk sommar for hatlestrendingen og resten av landslaget. Dei siste fem-seks vekene har dei vore samla til trening og kampar i Polen, Danmark, Kristiansand og Arendal, medan Oslo og Praha står for tur. Dermed har det ikkje blitt mykje tid heime i det siste; til gjengjeld var sesongen i Tyskland ferdig tidleg i år. Då nytta Lars Kristian Ekeland høvet til å prøva seg som lærarassistent på Hatlestrand og i Strandebarm. Det er eit yrke han ikkje hadde sett for seg å hamna i.

– Men det var spennande, utfordrande og interessent. Kanskje det er ei moglegheit? Det er jo ei lang utdanning, men eg får sjå når eg kjem heim til Norge igjen og kan byrja å studera, seier han.

Bundesliga

Til vanleg er Lars Kristian Ekeland profesjonell volleyballspelar i Tyskland hjå bundesligaklubben TSV Haching München. Sesongstart der er 29. september. Fyrste året gjekk ikkje heilt som han håpa på.

– Eg har større forventningar i år, og veit meir kva det går i. Eg kan ikkje seia meg heilt nøgd med sesongen i fjor, korkje personleg eller lagmessigt. Målet må vera å hamna kring midten av tabellen no, og gjerne litt over det, vurderer han.