Johnny jaktar storformen

– Eg skal i gang med mi tredje oppkøyring for året, og sesongen er ikkje eingong halvspela.

 

Johnny Furdal er endeleg skadefri og omsider på plass på Viking sin midtbane. Men det tok tid å koma dit.

– Var det frustrerande å venta så lenge?

– Ja. Eg galtrente i desember til februar, og så kom skaden og sette meg ut i fem månader. Det tar tid å byggja opp fotballformen, spesielt når du er blitt litt eldre. Det er også kjedeleg å ikkje kunna bidra med ein gong ein er skadefri, fordi ein heng eit stykke etter dei andre, seier Johnny Furdal til Grenda.

 

Ikkje smertefri

Etter at Viking var til Lerkendal og leid eit 5-1-nederlag for Rosenborg, har han hatt ei god vekes ferie heime hos far i Omvikdalen. Når du les dette er han attende i Stavanger, i gang med treninga før haustsesongen.

– Det blir mi tredje oppkøyring for sesongen, og halvparten av seriekampane er ikkje spela enno, kommenterer han.

Status for midtbaneeleganten er at han er skadefri, om enn ikkje heilt smertefri.

– Beinet er ikkje perfekt, men eg kan spela fotball att, melder 33-åringen.

Ganske kjapt etter returen har Furdal kjempa seg til plass i startoppstillinga til Viking, og det er tydeleg at han nyt stor tillit hos trenar Bjarne Berntsen.

– Eg er litt overraska over at eg har fått starta kampar så raskt. Cupkampen mot Stabæk var bra, medan det i dei andre kampane har blitt mest springing, påstår han.

 

Debutant

33 år gamal har han omsider debutert i eliteserien, noko som må vera det eldste ein har sett av slike debutantar her til lands.

– Det er ein spesiell situasjon, men veldig kjekt! Eg skulle ønska eg var yngre når det skjedde, for prestasjonane går nok litt ned, men eg ser jo at det er mange som spelar lenge, som Frode Kippe og Daniel Braathen, og fleire til. Førebels har eg ikkje vore i min beste fotballform i 2019. Eg håpar å koma meg opp dit i løpet av hausten, seier Furdal.

Sjølv om elitseriedebut er stort, er det ikkje det største som har skjedd han i år. For tre månader sidan vart han pappa til Isak.

– Det er koseleg. No har han byrja å smila og le, og er verkeleg vaken. Og han er definitivt klar over kva han vil. Det er fascinerande, smiler Johnny.

Om han kjem til å ta ut pappaperm i inneverande sesong, er tvilsamt.

– Men eg trur eg har høve til å utsetja det i inntil tre år. Så når eg legg opp kan eg ta permisjonen, ler han.

 

Fotball = gøy

Saman med sambuaren Mabruuka har han funne seg godt til rette i Stavanger.

– Det er flotte folk der. Alle i klubben hjelper til og me trivst godt, smiler han.

Sjølv om Johnny har kome seg langt frå Norway Cup, har han rikeleg med minne frå åra han sjølv var på turneringa.

– Det var det største me kunne vera med på som ungdommar. Heile pakken, med bussen bort, liggja på skule, storbyen Oslo var spennande, og ikkje minst å gå på Ekebergsletta og sjå. Det var sosialt og mykje fotballglede. Det er noko me gledde oss veldig til, og som er kjekt å ha opplevd, seier han, og bringer samtalen inn på det som er mantraet hans.

– Som alle veit: Fotball skal vera gøy, enten ein er veldig seriøs eller useriøs. Fotball er framleis gøy, og eg ser fram til hausten, sluttar profilen.