Inviterer til ny og endra utgåve av Baroniløpet

I 2016 gjorde Baroniløpet eit vellukka comeback etter 21 års fråvær. Etterpå skulle løpet ha blitt gjennomført kvart år, men måtte avlysast i 2020 grunna koronapandemien og i 2023 grunna låg og forseinka påmelding. No vonar Rosendal Turnlag at 2024-utgåva kan bli ein ny suksess. Datoen er sett til søndag 21. april, og det er allereie opna for påmelding.

Med i arrangementsnemnda er Vicente Modahl kome. I 30 år budde han i England og trena fleire av dei beste friidrettsutøvarane der. No er han busett på Os.

– Rosendal Turnlag ynskjer velkommen til eit tradisjonsrikt løpsarrangement, eit arrangement som vi ynskjer å utvikla for både klubb og mosjonistar. Alle som har eit par joggesko er velkomne, store og små. Vi har endra programmet og distansane for å leggja meir til rette for alle, opplyser Modahl.

Ei engelsk mile

Årets opplegg ser slik ut:

* Klasse 0-9 år, 270 meter, eigna for barn med foreldre; gåande, springande eller trillande med vogn.

* Klasse 10-12 år, 450 meter.

* Klasse 13-14 år og 15-19 år, ei engelsk mile (1609 meter).

* Klasse senior, 5 km, elite- og klubbutøvarar samt mosjonistar.

Vicente Modahl vedgår at dei har hatt kort tid til å førebu årets løp, men vonar på god påmelding.

– Vi inviterer alle i distriktet til å melda seg på og bli med på løpsfesten i Rosendal. Årets utgåve er ein forsmak på det vi ynskjer å få til frå neste år, nærare bestemt eit større arrangement for Kvinnherad og Vestlandet. Vi ynskjer samarbeid med næringslivet for å ikkje berre promotera distriktet og Baroniet, men også få folk ut av huset for å få god trim og byggja ein lokal folkefest for alle, kommenterer Modahl.

Noko endå større

Han og friidrettsgruppa har også lyst til å utdanna nye trenarar, og oppmodar interesserte til å melda si interesse for å bli ein del av friidrettsmiljøet.

Også leiar i friidrettsgruppa til Rosendal Turnlag, Anna Totland Lunestad, vonar på stor deltaking den 21. april.

– Eg håpar at dette blir eit løp som også trekkjer til seg deltakarar frå resten av Kvinnherad, og at vi etter kvart kan utvikla Baroniløpet til å bli noko endå større, seier ho.