Imponerte i VM: – Eg er den beste som er i full jobb og har mange ungar

Laurdag benka sykkelinteresserte over heile verda seg føre internett for å følgja finalen i E-sykling direkte frå Abu Dhabi. I herreklassen stilte 22 ryttarar til start, deriblant Vidar Mehl.

Grenda snakka med syklisten tysdag føremiddag. Då var 37-åringen, som opphavleg er frå Omvikdalen, attende på jobb som salsingeniør hjå Gjøvik-firmaet Hunton Fiber AS.

– Eg er litt prega. Det må bli litt kaffi i dag, smilte Mehl.

Han hadde lov til å vera trøytt. Heimreisa starta nemleg frå Abu Dhabi rett over midnatt, lokal tid, natt til måndag. Vidar var heime fyrst klokka 01 natt til tysdag. Fire timar seinare vakna den yngste ungen, og far måtte stå opp. Deretter bar det rett på arbeid.

Skvisa krefter

Men når det går så bra som det gjorde i verdsmeisterskapen, toler ein heilt sikkert å vera sliten. Vidar Mehl makta ein knallsterk 6. plass i samandraget etter dei tre øvingane i finalen.

– Eg er veldig nøgd utifrå utgangspunktet. Eg har slite valdsamt med sjukdom etter at eg kvalifiserte meg til VM, så formen har vore dårleg, og eg har ikkje følt meg sprek i det heile. Forventningane var låge, rett og slett fordi kroppen ikkje har fungert, fortel han.

Sjukdomsproblematikken starta allereie då august gjekk over til september.

– Minstemann byrja i barnehagen på den tida, og dermed har det vore basseluskar overalt. Sånn sett har det lege litt i korta at eg ville bli sjuk, humrar Mehl.

– Eg veit ikkje kva som skjedde i helga, men eg klarte på eit eller anna vis å skvisa nokre krefter ut av kroppen. Eg slo til og med fleire av favorittane. Resultata mine var nesten like gode som i kvalifiseringa då eg sat heime og på eige utstyr. Så eg er veldig nøgd og stolt over det eg klarte å få ut av ein sliten kropp, utdjupar syklisten.

Skal ikkje gå an

Etter den fyrste øvinga i VM-finalen, sprinten, låg han på 4. plass. Berre dei tre syklistane frå USA var raskare.

– Eg veit at eg er god til å spurta, men det handlar også om at ein må «teima» spurten. Amerikanarane hadde bestemt seg for samarbeida og køyra skikkeleg lagtempo, så då dei passerte startstreken for sprinten, hadde dei allereie kjempehøg fart. Det var ein genistrek av dei, fortel Mehl.

Også i øvingane «The Strategist» og til slutt «All Out» gjorde vår mann det godt. Ein kan såleis berre undra på kva som hadde skjedd dersom helsa hadde vore betre.

– Eg veit at dersom eg hadde vore frisk og hadde fått ei god opplading, så hadde eg verkeleg sniffa på ein pallplass. Uansett er det kjekt å få stadfesta at ein har nivået inne. Eg føler eg trefte ganske bra med taktikken min, og fekk ut maksimalt av det eg hadde inne, analyserer Mehl.

Det ein også skal ta med i reknestykket, er at mange av konkurrentane hans er enten heilt eller tilnærma profesjonelle syklistar.

– Eg føler nesten at eg eigentleg ikkje skal kunna slå dei, men så gjer eg det likevel. Det er jækla gøy. Det skal ikkje kunna gå an, så eg må jo gjera noko rett. Eg vart i alle den beste som ikkje er heilprofesjonell, den beste med mange ungar og den beste som er i full jobb. Tikkar du av dei boksane, så vart eg verdsmeister, flirer Vidar Mehl.

Tour de France

VM-finalen gjekk føre seg i ein stor sal, med mykje folk som såg på. På dei fremste rekkene sat dei prominente gjestene, som rike sjeikar, Peter Sagan og Tadej Pogacar. For uinnvigde kan ein opplysa at dei to sistnemnde er blant tidenes aller beste syklistar. Peter Sagan frå Slovakia har nyleg lagt opp, men presterte å vinna VM-gull i landeveg tre år på rad, deriblant i Bergen. Tadej Pogacar frå Slovenia har fullstendig dominert verdseliten i år. I løpet av 2024 vart det ni store triumfar, inkludert VM-gull i landeveg og samanlagtsigrar i både Tour de France og Giro d’Italia.

– Det var stas å ha dei i salen. Eg hadde tankar om å få snakka med dei, men det var heile tida noko som skjedde, og vi vart geleida både hit og dit, så det kokte vekk i kålen, seier Vidar Mehl.

– Korleis var opplevinga å vera med i ein slik finale?

– Det var noko for seg sjølv, og ei setting eg aldri har vore borti før. Kjempekult at dei klarte å gjennomføra det så profesjonelt, og at alt fungerte. Vi vart veldig godt tekne vare på heile tida, seier 37-åringen.

Større og større

Det må presiserast at det var ein ekte verdsmeisterskap han deltok i. E-sykling er no ei offisiell grein hjå det Det internasjonale sykkelforbundet. Verdsmeistrane fekk difor ta på seg regnbogetrøya slik vinnarane i dei tradisjonelle øvingane får.

– Mange veit nok ikkje kor stort dette eigentleg er, meg sjølv inkludert. E-sykling blir større og større, og eg var stolt berre over å ha kvalifisert meg til finalen, seier Vidar Mehl.

Også neste år ligg det an til at VM-finalen går av stabelen i Abu Dhabi. Mehl satsar på å kvalifisera seg då også. I så fall køyrer han for medalje.

– Ja, det vil eg seia må vera målet. Slik etappane var lagt opp no, med såpass mykje eksplosivitet, så passa det meg veldig bra. Håpar at det blir noko liknande neste år også, seier Mehl, som no har avslutta årets sesong.