Ikkje 100 prosent trygg på VM-forma

Han ville gjerne ha sete i gymsalen til Omvikdalen skule når VM-startar, men ein treningtur til Spania innbooka før VM-uttaket gjer at han må bli austpå.

– Er VM-forma prikka inn?

– Ikkje enno, og eg treng dei neste dagane. Eg var i kjempeform i november, men har slite litt etter ein tur til Kanariøyane i jula. Eg har ikkje funne forma att det heilt enno, og kanskje starta eg opp treninga litt tidleg, med litt sjukdom i kroppen, spekulerer Vidar Mehl.

E-sykkel

Som Grenda har skrive om tidlegare, er både Vidar Mehl og Ingeborg Hestad tatt ut til VM i E-sykkel. Både damene og herrane skal sykla same løypene, og det vil bli sykla tre ritt for å få kåra verdsmeisteren for begge kjønn. Det stiller 100 til start på første løpet. Dei 30 beste går til ritt nummer to, og deretter dei ti beste til tredje og siste ritt.

Vidar satsar på å ha overskot på laurdag kveld, og håper at erfaringa hans skal hjelpa.

– Ambisjon 1 er å koma vidare frå første løpet. Løype 2 tøffare, med mykje klatring. Det er ein rein bonus viss eg kjem til tredje løpet. Det første rittet passar meg bra, men det er mange marginar som kan spela inn der, meiner han sjølv.

Mehl bur på Gjøvik, og er sambuar med Helene Haugland frå Uskedalen. Paret kjøpte seg nytt hus i førre veke, og ser fram til å flytta inn i april.

– Det blir godt med litt albogerom, spesielt med min hobby. No får eg ei bod på 30 kvadratmeter og 20 kvadratmeter med treningsstudio i kjellaren, forklarer Vidar.

Han er blant dei som har driva med E-sykkel ei god stund allereie, og meiner pandemien sette fart på spissinga og seriøsiteten rundt E-sykkel.

– No er det fleire plattformar enn Swift der ute, og når det no kjem løp med pengepremiar, betyr det at du får fleire konkurrentar. Det passar meg bra at det blir meir av dette. Det blir travlare framover, så det kan vera det er her eg må prioritera å konkurrera. Samtidig er det kort og effektivt når ein er i trening, seier Vidar.

Han har hatt mange år med full satsing på sykling, parallelt med jobb.

– Dette er noko av det som fungerer for meg, med meir innesykling enn utesykling.

VM i ultra

Medan Ingeborg Hestad varmar opp og gjer seg klar i Omvikdalen, kjem Vidare til å vera i sving heime på Gjøvik.

– Det blir VM heime i boda på laurdag. Viss eg ikkje skulle til Spania natt til søndag, så hadde eg kanskje kome heim og sykla med Ingeborg. Eg har lova Per Korsvold å ta ein runde på facetime med dei i Omvikdalen etter at eg er ferdig med mitt VM, fortel Vidar, som startar 1915 på laurdag.

– Så får me sjå kor seint det blir, om det blir etter første eller andre eller tredje rittet, smiler han.

– Har du nokon tips til Ingeborg?

– Ver offensiv inn i spurten. Det er betre å starta for tidleg enn for seint.

– Korleis ser resten av sesongen ut for deg?

– Eg skal på ei samling i Spania no etter VM. Det blir normal trening i mars og april. Då er det kanskje nokon ritt ute i april, men hovudsesongen startar nok i mai. Det blir å byggja kapasitet etter VM og laga grunnlaget større, heller enn å vera sjuk. Eg håper jo å bita frå meg i år også, seier Vidar.

Tidlegare i år hadde han mellom anna Sykkel-Wasa som eit mål for sesongen, men den krasjar med Norgescupen.

– Me får ta det litt etter kvart. Eg har heldigvis nådd mange av måla eg sette meg tidlegare. Eg har ein plan om å reisa til USA i november og delta i ultra-VM 24 timars ritt i år, viss sommaren går som han skal. Då er me ein liten gjeng som evt. reiser bortover i saman, seier syklisten som nett runga 36 år.

– Det blir éin vondt ekstra for kvart år, oppsummerar han aldringsprosessen.

– Eg ser det er mange som held på lenge, både i sykkel i langrenn, så eg får halda på litt til, sluttar han med VM like om hjørna.