Idrettsglede på Rosendalsleikane
I helga gjekk årets Rosendalsleikane av stabelen på Rosendal stadion. Sjølv med vekslande vêr var det mange som deltok.
Publisert
Med greiner som lengde, 100 meter, kulekast, 600 meter og høgde var det mykje forskjellig å prøva seg på i helga. Fleire hadde teke turen frå Voss, Os og til og med Volda.
Til neste år har stemneleiar Vicente Modahl ambisjonar om eit internasjonalt stemne, og i år starta dei så smått med å innføra ting som «callcenter», noko dei har på dei større stemna.
Annonse
– Det har vore litt innkøyring i forhold til det, det er jo nytt for oss alle. Etter at deltakarane har fått startnummeret sitt går dei til «callcenter» og så vert dei ført gruppevis ut på bana. Det er litt for at vi skal ha kontroll på trafikken inn og ut av bana, fortalde funksjonær Malena Skaale.
Fokus på idrettsglede
Men sjølv om leiinga vil satsa internasjonalt er dei bestemte på å samstundes ha eit lokalt fokus.
– Vi har jo veldig fokus på barna og idrettsgleda. Vi har vore veldig tydelege på at vi vil ha med barneløpet, så begge dagane startar med løp for dei som er 0-5 år, det er ein veldig kjekk tradisjon, fortalde Skaale.
Annonse
I år har dei også digitalisert all informasjon, og ein kunne få resultata fortløpande på nettet.
Det spøkte litt med vêret for leikane, men laurdag var det relativt opplett.
– Det er ganske utruleg at det er nysnø på fjelltoppane i dag. Det var seks grader når eg køyrde innover, men vi har vore relativt heldige. Det er jo greitt med litt vind og kulde, men det er ikkje så kjekt om det pøsregnar, sa Skaale.
Vind var det nok av, faktisk såpass mykje at fleire løparar på 100-metersløpet ikkje fekk godkjent tida grunna medvind.
Nesten internasjonal
Neste år vil dei altså laga til internasjonalt stemne. I år tok familien Keilen Thomsen turen heilt frå Volda, så dette er ikkje heilt uoppnåeleg.
Annonse
Mamma Bjørg er frå Rosendal og tok med seg gjengen sin nedover for Rosendalsleikane for tredje år på rad.
– Det er veldig kjekt å vera med her. Eg går ikkje eigentleg på friidrett heime, men det er kjekt å prøva seg på stemne, fortalde Alfred Keilen Thomsen (14).
Alfred prøvde seg på kulekast og 100-meter og vann lika godt begge greinene.
Alle resultat kan de sjå her.
