I gang med ny sesong i 2. divisjon
Strand-Ulv-jentene hadde berre eitt tap i 2. divisjon i fjor, og denne sesongen starta torsdag borte mot nettopp det laget, Rossvoll. Laurdag var det så klart for heimekamp.
Publisert
– Rossvoll er veldig gode. Dei har ein vaksen stall og er stabile, noko me var førebudde på. Men jentene kjempa godt, spesielt i fyrste sett, som enda 24-26. Dei spelte faktisk betre i det settet enn me gjorde i dagens kamp, konkluderer trenar Trine Sundfjord då Grenda slo av ein prat etter sesongens fyrste heimekamp laurdag.
Om kampen i Øystese fortel ho at Strand-Ulv-spelarane var kvikke i forsvaret og plukka utruleg mange ballar, og at det var på mange måtar ein god start og ein god kamp, sjølv om det enda i 3-0 tap. Ho legg til at vekekampar er ei utfordring for laget, då mange av spelarane går på skule vekke. Både Ronja Kirketeig og Silje Vik går no på skule i Førde og spelar for elitelaget til Førde, men kjem likevel til å få med seg mesteparten av kampane til Strand-Ulv, sidan resten av kampane vert lagt til helg. Det betyr 4-5 timar i bil eller buss kvar veg på desse to.
Annonse
– På torsdag hadde me heldigvis Mari S. Fagerlid, som går på Framnes, med som oppleggar i staden for Ronja. Ho gjorde ein kjempejobb, men Rossvoll vart litt for sterke, fortel Trine.
Fyrste heimekamp
Laurdag var det Viking D3 som stod på andre sida av nettet på Hatlestrand. Denne kampen vann vertane 3-0. Og sjølv om Viking stilte med eit ungt lag, hadde Strand-Ulv-jentene tre ungdomsskulejenter med seg, og yngstemann Leah har endå nokre veker att før det står skrive 14 år på kaka.
– Anne Pernille Nistad (15 år) og Leah Maimuna Hjortland (13 år) spelte kvar sin kamp i fjor, men ein kan eigentleg seie at dei hadde debuten sin no i haust. Dei har hatt ei kjempeutvikling og er endå veldig unge. I dag hadde me ingen med oss som var eldre enn 17 år, seier trenaren.
Annonse
Steppar opp
Sundfjord erfarer at dei yngste ofte steppar godt opp når dei eldste ikkje er med, og fortel at dei eldre jentene som mellom anna går på ToppVolley, òg har tilbod om å vere med.
– Det er ikkje slik at me forventar at dei skal vera med, men om dei er heime og har lyst, så får dei sjølvsagt spela. Me håpar å få dei med i RM og NM, forklarar ho.
Neste helg reiser Strand-Ulv til Bergen for å møta BSI.
Trio-damene startar ikkje sesongen før komande helg, og spelar då heimekamp mot BTSI og bortekamp mot Rossvoll.
