Her er Johnny tilbake på Brann-trening

Måndag sparka Brann i gang årets fyrste trening i Vestlandshallen. Det med Johnny Furdal som ein del av treningsgruppa. 

– Det var artig det. Det er jo sjølvsagt alltid tungt å starta opp att etter ferien. Men det var ei roleg økt. Eller i alle fall rolegare enn dei pleier, seier Johnny Furdal.

 

Kosar seg

Han møtte tidleg måndag morgon opp på Brann stadion for å fortæra dagens frukost saman med resten av spelartroppen og støtteapparatet, før dei i samla tropp tok turen til Åsane og Vestlandshallen for årets fyrste fotballtrening.

– Det gjekk veldig greitt det, det er klart det er lenge sidan ein har vore borti ein ball. Så det var litt tunge hovud og trøtte bein. Så det er ikkje på ein slik dag ein finn ut om ein heng med fotballmessigt, men det var sjølvsagt veldig gøy, seier Johnny.

Han er ein del av den per i dag 20 mann store troppen som skal trena fram til 16. januar. Då set Brann-troppen seg på eit flyt til varmare strøk, nærare bestemt Gran Canaria.

– Om eg er med der veit eg ikkje. Eg har ikkje høyrt noko enno, og om eg var tiltenkt å vera med så hadde eg nok høyrt noko allereie. Men fotballen er kynisk og ting snur fort, så plutseleg får eg beskjeden, seier han.

Men om det vert treningsleir eller ikkje, er ikkje noko den elegante midtbanespelaren frå Omvikdalen brukar mange kaloriar på å fundera på. Han vel i staden å fokusera på det som skjer no.

– Dei skal selja, kjøpa og sikra kontraktar med allereie eksisterande spelarar. Plutseleg skjer det noko som endrar situasjonen den eine eller andre vegen. Så det er noko eg ikkje stressar over i det heile tatt. Akkurat no så koser eg meg berre og det berre gøy med å sjå korleis kvardagen er her i Brann, seier Furdal.

Luksus

Ein kvardag som er heilt annleis enn den han er vane med ute på Ågotnes.

– Dei har det fint her, det har dei. Her er alt tilrettelagd for deg, du møter opp, et frukost, trener og får servert lunsj. Medan vi i Nest stiller i ein garderobe med nokre slitne treningskler vi har vaska sjølv, ler Johnny.

Men fram til 16. januar skal også han få kjenna på luksuslivet med ferdigvaska treningskler og tilrettelagd treningskvardag med innlagte måltid. Det i ein fysisk form han aldri før har vore i nærleiken av når kalenderen viser januar.

– Eg er ikkje nokon maskin, eg er fotballspelar eg. Eg er verken fødd med dei største lungene eller musklane. Samstundes så har eg aldri trent så mykje i desember som eg gjorde i 2017. Så ein skal ikkje sjå vekk i frå at det vert nokon personlege rekordar når vi skal gjennom ulike testar i morgon, seier Johnny som også i tysdag stiller på Brann-stadion klokka 09.00 for ein betre frukost før han på føremiddagen skal få testa både styrke og kondisjon.

– Vi byrjar i styrkerommet, så eg er vel full i mjølkesyre før vi i det heile byrjar på kondisjonen, smiler Furdal.