Vann NM:
– Heilt vanvitig kult
Tora Tuften Aksnes-Øystese kan no kalla seg norsk meister i volleyball. Det etter å ha spelt ein kamp ho aldri har opplevd maken til.
Laurdag vart cupfinalane i volleyball arrangerte i Oslo. Hjå damene møttest TIF Viking og ØKSIL, som også er dei to same laga som ligg i teten i seriespelet. TIF Viking stilte med både Tora Tuften Aksnes-Øystese frå Hatlestrand og Terian Kaelo, som har hatt deler av oppveksten same stad. Med siger ville dei følgja i spora til sambygding Lars Kristian Ekeland. Han vart norsk meister med TIF Viking i 2023.
Bli rørt
Annonse
Det skulle visa seg at hordalendingane var klart betre enn nordlendingane denne gongen. TIF Viking, som hadde nådd finalen for aller fyrste gong, sigra til slutt 3-1 (25–13, 22–25, 25–19, 26–24).
– Ekstremt kult å få vera med og vinna cupfinalen, og bli historiske saman med alle dei fantastiske jentene eg er blitt så glad i, skriv Tora til Grenda. Intervjuet må nemleg føregå på Messenger, sidan ho etter kampen reiste på tre vekers ferie i Australia med nokre venninner.
23-åringen slår fast at ho aldri har opplevd ein liknande kamp.
– Heilt vanvitig kult å ha så mange publikummarar. Både stemninga og Viking-gjengen som heia oss til siger var til å bli rørt av. Dette betyr veldig mykje. Heile familien med fleire kom og såg på, og hadde det utruleg kjekt i tillegg, fortel ho.
Annonse
Ny motivasjon
Tora Tuften Aksnes-Øystese har spelt på TIF Viking sidan ho var 16 år gamal.
– Eg har vore med på mykje, blant anna var vi eitt spelarpoeng frå nedrykk for nokre år sidan. No står vi cupgull, det er sjukt, konstaterer ho.
Alt tyder på at Tora ynskjer å satsa vidare på idretten.
– Volleyball tar mykje tid og energi, men gir dobbelt så mykje i glede og kule opplevingar som eg er heldig og får vera med på. Det er derfor ein fortsett å halda på år etter år, og vel vekk andre ting. Cupfinale gir ein ny motivasjon. Så får sjå kva framtida bringer, avsluttar Tora Tuften Aksnes-Øystese.
