Har los på seriesiger – grublar på 1. divisjonsspel
To reine sigrar har sendt Strand-Ulv til topps i serien med éin kamp igjen. No vurderer lagleiinga om dei skal prøva på opprykk til 1. divisjon.
Publisert
Strand-Ulv brukte vinterferieveka til å koma á jour med konkurrentane i tal kampar, og over alle på tabellen. To 3-0-sigrar vart fasit.
– Både kampen sist tysdag og på søndag gjekk i grunnen veldig greitt. På tysdagen var nokon av dei vanlege vekke, medan andre var heime på vinterferie, så var veldig kjekt å ha mogelegheit til å ha med Tertnes/TVN-spelarar ein kamp, seier trenar Trine Sundfjord.
Annonse
Vurderer 1. divisjon
– Me var veldig sterke i serv, særleg tysdagskampen, så det bidrog nok til at kampen var ferdigspelt på under timen. Søndag var me tilbake med «vanleg» lag, og det blei også ein kamp spelt på mindre enn ein time, sjølv om me følte at me tidvis rota litt spelmessig, oppsummerer trenaren.
Med berre éin kamp igjen, lokaloppgjeret mot Trio 21. mars, kan det gå vegen. Trine Sundfjord les likevel tabellen, og ser at siger til Strand-Ulv vil gje seriesiger.
– Me er så smått byrja å grubla på om det kan vera aktuelt å prøva seg på opprykksturnering til 1. divisjon, om me framleis ligg øvst når siste kamp er spelt. Så me undersøker no kva spelargruppe me eventuelt har til neste sesong. Om me får den på plass, må me gjera ein jobb med det økonomiske. Det kostar å stilla i 1. divisjon, så det blir full sponsorjakt om dette skulle bli aktuelt, seier Sundfjord.
Annonse
Vil få motstand
Kvaliken går 20.-21. april, helga etter U17-NM.
– Påmeldingsfristen er allereie 9. april, så ganske kort tid etter siste kamp som er 21. mars. Derfor må me byrje prosessen no, sjølv om me på ingen måte tar for gitt å liggja øvst på tabellen til slutt.
– Me skal gjera det vanskeleg for Strand-Ulv, og skal visa at me er betre enn det me fekk vist i bortekampen, har Trio-trenar Eirik Sævareid sagt tidlegare.
Noko av det Strand-Ulv har profittert på i årets sesong, er at dei har fleire spelarar som går på vidaregåande skular med volleyballinjer. Desse nyt godt av eit regelverk som gir dei lov til å spela kampar for andre lag, i tillegg til at dei kan vera Strand-Ulv-spelarar.
– «Studentane» kan framleis vera på overbygging i andre klubbar, men kan ikkje spela i same divisjon. Altså kan dei spela elite med til dømes Viking, sjølv om dei spelar 1.div hos oss. TVN (Toppvolleyball Norge) har litt eigne reglar for det der trur eg, men det er nok vanskeleg å rekna med spelarane derifrå, sidan dei sjeldan er heime, sluttar Sundfjord før arbeidet med å finna sponsorar held fram.
