– Har berre lyst å gå gode skirenn

Måndag offentleggjorde Norges skiskyttarforbund uttaket til VM, som går av stabelen i sveitsiske Lenzerheide frå 12. til 23. februar. På lista stod også Ragnhild Femsteinevik frå Hatlestrand. Ho får dermed delta i verdsmeisterskapen for 2. gong i karrieren. Fyrste anledning var i Oberhof i 2023. Den gong vart ho til og med teken ut på det norske stafettlaget, men vart sjuk berre få timar før start, og måtte melda avbod. Seinare viste det seg at ho var blitt smitta av korona.

No får ho altså ein ny sjanse.

– Det er veldig stas, seier ho på telefon til Grenda.

Ragnhild Femsteinevik kan avsløra at ho fekk gladmeldinga allereie under frukosten på søndag, då landslaget var i Ruhpolding i Tyskland.

– Hadde du venta dette?

– Eg er jo nett kome inn i verdscupen, så det var litt overraskande. Men gøy å koma med, vurderer ho.

Før sesongen starta var det høgst usikkert korleis dei næraste månadane kom til å bli for utøvaren som er medlem i Hålandsdal IL. VM var i liten grad tema.

– Målet mitt var å få gå i verdscupen, så eg tenkte eigentleg ikkje på VM. Det har vore litt vanskeleg å koma seg opp (til verdscupen), men det gjekk til slutt, fortel Femsteinevik.

Fyrste reserve

– Kva forventningar har du til VM?

– Det har eg ikkje tenkt så mykje på. Eg synest det er kjekt å konkurrera mot dei beste, det er det ein går og tenkjer på gjennom sommaren og hausten. Eg har berre lyst å gå gode skirenn. Uansett må vi sjå om eg blir teken ut til å gå renn, for det kan òg vera at eg blir reserve, seier skiskyttaren.

29-åringen har berre gått eitt individuelt renn og éin stafett i verdscupen i årets sesong, begge deler i Ruhpolding i helga. Begge deler gjekk dessutan veldig bra, med høvesvis 17. plass og beste norske og ein knakande god ankeretappe på stafetten. Desse resultata var truleg avgjerande for VM-uttaket. Men søndagens fellesstart gjekk Ragnhild Femsteinevik glipp av, så vidt det var.

– Det var 30 som fekk gå fellesstarten og eg var tredje reserve. To av løparane stilte ikkje opp, og dermed vart eg den fyrste som ikkje fekk vera med.

– Litt kjedeleg for deg, kanskje?

– Både og. Det hadde vore kjekt å gå, men samtidig var eg litt sliten. Så begge deler gjekk fint for meg, vurderer ho.

Éin bom for mykje

Søndag kom skiskyttarane fram til Anterselva. Då Grenda snakka med Ragnhild måndag ettermiddag, hadde ho nett vore ute på ski. Det vidare opplegget fram mot VM er ikkje heilt spikra enno.

– No skal eg i alle fall gå sprinten og jaktstarten denne veka, og eventuelt stafetten, seier Ragnhild Femsteinevik, før ho tek atterhald om at ho fyrst må kvalifisera seg til jaktstarten, der dei 60 beste på sprinten får stilla på startstreken.

Uansett korleis det går, må ein kunna seia sesongen har blitt veldig bra.

– Det har vore litt dårleg skyting innimellom, og stadig éin bom for mykje til å koma til verdscupen. Men eg har i alle fått jobba meir med skytinga og det fysiske, oppsummerer ho sjølv.

Programmet

Verdscupen i Anterselva byr på 7,5 kilometer sprint på torsdag, 10 km jaktstart på laurdag og stafett på søndag. Verdsmeisterskapen startar med mix-stafett onsdag 12. februar. Fredag 14. er det klart for sprint for damene, medan jaktstarten vert skipa til søndag 16. Kvinnene skal gå 15 kilometer onsdag 19. februar, medan stafetten står på programmet laurdag 22. Fellesstarten avsluttar det heile søndag 23. februar.