Handballfeber for 600

Spelarane på Bergen Håndball skaffa seg langt over femti nye fans då dei brukte laurdag ettermiddag på å trena unge KHK-spelarar. Då dei same herrane tok avkast som heimelag i Kvinnherad Arena, hadde dei kring 600 tilskodarar i ryggen, rett nok minus to dusin med klare Sandnes-preferansar i heiinga si.

Strafferedningar

Minst 500 av dei på tribunen er ikkje vane med å gå på herrekampar i Rema 1000-ligaen, og dei fekk ei oppleving som må ha vore positiv. Det var stor seremoni og mykje lyd før kampen, og då Kjetil Johansen frå Sandnes scora det første eliteseriemålet i Kvinnherad Arena, auka lydnivået.

Sjølv om publikum flest stod i Bergen-hjørna, var det Sandnes som tok føringa utover i opningsomgangen. Mykje av æra for det hadde Sandnes-keeper Per Ingvald Søyland Bø, som kom til Husnes for å ha ein maksdag av ein førsteomgang. Han stod for to strafferedningar, samt eit knippe 100%-redningar.

– Dette er suksess, definitivt. Me skal vera nøgde med dette. 5-600 på tribunen, og dette trøkket. Einaste som ikkje har levert til no er Bergen Håndball, sa KHK-eldsjel Dagfinn Gjerde i pausen.

Stor suksess

Kvinnherad Handballklubb hadde lagt sjela i å gjera kampen til ei storhending. Halvannan time før avkast opna det dørene til hallen, og let barn og ungdom boltra seg i både turnhallen og klatreveggen. Ut kunne dei testa kastearmen sin og måla farten på skota sine.

– Det var nok 2-300 på plass i «open hall» før kampen. Sjølve kampen her er eit strålande utstillingsvindauge for både handballklubben og herrehandball. Bergen Håndball kom i går og skryt av både plassen og fasilitetane, og seier det vil tilbake, sa ein nøgd KHK-styreleiar Daniel Haugland då kampen gjekk mot slutten.

Gutehandballen har stort sett vore fråverande i Kvinnherad Handballklubb, mellom anna som ein konsekvens av avgrensa hallkapasitet tidlegare. Med dobbel speleflate på plass i Kvinnherad Arena er det endra.

– Me har nettopp starta opp eit gutelag i alderen 7/8 år. Me har plass til fleire, dei trenar på onsdagane, reklamerer Haugland med eit smil.

Han og klubben hadde fått på plass oppunder 60 frivillige til å vera med å arrangera Rema 1000-ligakampen.

– Dette gir meirsmak for oss, legg han til og hintar til at dei er i kontakt med klubbar for å få meir elitehandball til Husnes.

Korleis kampen enda? Det er kanskje ikkje det viktigaste denne dagen, men for historiebøkene kan det noterast at Sandnes vann 29-22. Om det påverkar Bergen Handball si vellæte over plassen og fasilitetane, vil visa seg seinare. Publikum forlét garantert salen med svolt på meir av dette, for kombinasjonen trykk, intensitet, lyd og stemning må ha gitt meirsmak til fleire enn Daniel Haugland.