Han vann Grenda-ligaen i Fantasy

Håkon Haga stod distansen ut og gjekk heilt til topps i Grenda sin Fantasy-liga. Dermed vinn han tur for to til England for å sjå fotball.

 

Håkon Haga fekk 73 poeng i søndagens avslutning, og enda med det på totalt 2.358 poeng. Med ein kanonrunde på 98 poeng kom ein kar med nesten same namn, Håvard Haga, sterkt i innspurten, men han mangla til slutt ni poeng. Håkon og Håvard er faktisk ikkje i slekt.

– Nei, vi er ikkje i slekt så vidt eg veit, men eg veit kven han er, fortel Håkon.

Nummer tre av dei 293 deltakarane vart Øyvind Bjørnevik.

Vinnaren vaks opp på Kaldestad, noko som også vert avslørt i lagnamnet hans «Kaldestad Spurs». Etter sivilingeniør-utdanning i Trondheim, flytta han til Bærum, der han no jobbar med softwareutvikling og dataprogrammering. Sjølv om Håkon ikkje forventa å gå heilt til topps i Grenda-ligaen, hadde han visse ambisjonar.

– Eg har jo spelt i nokre år, og det har gått betre og betre. Dessutan har eg brukt meir tid på dette etterkvart. Resultatet i år er personleg bestenotering, både når det gjeld poeng og ranking, seier Håkon Haga.

 

Siktar endå høgare

Han har spelt Fantasy Premier League heilt sidan 2010. Den gamle plasseringsrekorden hans var frå 2016/17, då han vart nummer 16.187 i heile verda. I år enda han på 10.412. plass, av i alt 7,6 millionar deltakarar. Dermed har han fem sesongar på rad der han har kome blant dei 100.000 beste, noko som regelrett er ein knallsterk prestasjon.

– Du skal treffa godt for å koma oppi der, men det er kjekt å sjå at det er mogleg. Neste år får eg sikta endå høgare, melder karen som fyller 37 i august.

– Brukar du mykje tid på å setja opp laget ditt?

– Eg høyrer ulike podcastar til og frå jobb. Det er ikkje tid eg hadde brukt til noko anna uansett. Når det nærmar seg fristane, les eg ein del på Twitter og snakkar med folk på chat. Eg veit ikkje kor mange timar det blir i veka, men sidan dette er ein slags hobby, er det berre kjekt, kommenterer han.

 

Tolmodig

Sjølve hemmelegheita bak suksessen forklarar han slik:

– Det er mange forskjellige vegar til Rom. Eg har vore ganske tolmodig og gjort få spektakulære sprell. Mykje av hemmelegheita er at eg er tolmodig og spelar forsiktig. Kanskje burde eg vore meir offensiv i enkelte periodar, men det er vanskeleg å vita når. Eit anna moment er at eg i år ikkje har teke eitt einaste «Hits» (minuspoeng grunna fleire spelarbyte enn det eine som er gratis), orienterer Håkon Haga.

– Kva spelarar har du vore mest trufast mot?

– Godt spørsmål. Det er ofte lettare å hugsa dei du ikkje har med, ler han.

– Men Jiménez har eg hatt mykje. Og Alexander-Arnold og De Bruyne trur eg har vore på laget mitt kvar einaste runde.

 

Heldig bytte

Til siste runde bytta Håkon Haga inn Riyad Mahrez. Det såg ut til å bli ein skjebnesvanger feil, for driblefanten starta på benken til Manchester City. Men han kom inn etter pause, og leverte både mål og assist. Det betydde ni viktige poeng for den lokale vinnaren.

Sivilingeniørar er normalt kloke folk, men Håkon Haga presterer faktisk å halda med Tottenham. Det er så gale at han til og med vurderer å nytta fyrstepremien til å sjå kvittrøyene.

– Eg var på den nye banen deira i haust, så vi får sjå. Det er mange andre stadion i England som det òg kunne vore kjekt å reisa til, filosoferer han.

 

Tabell (alle med meir enn 2.250 poeng):

Rank   Lag & manager                                     GW     Totalt

1          Kaldestad Spurs         Håkon Haga       73        2358

2          Jossmen                     Håvard Haga      98        2349

3          Bamsebukt XI            Øyvind Bjørnevik 73        2348

4          Røkla                         Christian Mæland 69        2334

5          Ole’s at the wheel       Johnny Håvik      82        2325

6          Rosendal River Boys  Kjetil Helvik         76        2317

7          T-Bones                      Terje Markhus     68        2313

8          ⚡ 2️⃣2️⃣�                 Helge Holdhus    57        2307

9          Unarmed army            Anders Saghaug 62        2290

10        neste år                      Sander Lillesletten 75        2288

11        Rashfordinhos            Rune Sandnes      59        2280

12        Erling Jevne                Stian Welde          46        2276

13        Burnley Sanders        Andreas Bjørgen    66        2274

14        royrvik                        Håvard Røyrvik      68        2272

15        Gogginos                   Geir Ove Fosse      81        2269

16        AC Arildonieri              Arild Gjertsen        75        2263

17        50 Shades O'Shea      Geir Pal Holm        73        2262

18        The Invincibles            Simon Korttila        63        2257

19        AllezAllezAllez            Johnny Øvstebø     71        2256

20        Kongelaget             Rolf Vidar G. Hansen  73        2254

21        MacGyver`s gutter     Jonatan Eskeland    85        2253

22        Bjartolini FC               Bjarte Keilen            67        2252

23        Mountainduck            Verner Fjelland         70        2251